दाङ । झण्डै तीन महिनादेखि हिउँका कारण बन्द भएको मध्यपहाडी लोकमार्ग मंगलबारदेखि सञ्चालनमा आएको छ । हिउँ हटाएपछि लोकमार्गको रुकुमपूर्व–बाग्लुङ सडक सञ्चालनमा आएको हो । 

यो सडक राष्ट्रिय गौरवको आयोजा हो । सडक हिउँका कारण पुस महिनादेखि बन्द भएको थियो । सात–आठ पटकसम्म लगातार हिउँ परेपछि सडक बन्द भएको थियो । जसले गर्दा यातायात ठप्प रहेको थियो भने सडक निर्माणको काम पनि प्रभावित बनेको थियो ।

हिउँ अझै नबिलाए पनि मंगलबारदेखि सडक भागको हिउँ हटाएर सडक सञ्चालन गरिएको छ । मंगलबार निर्माण कम्पनीले डोजर लगाएर सडकको हिँउ हटाएको छ । यस सडकखण्डमा अहिले सिद्धिसाइ कन्स्ट्रक्सन कम्पनीले कालोपत्रेको काम गर्दैछ । तीन महिनासम्म यो सडकमा आवतजावत बन्द भएको निर्माण कम्पनीका इन्चार्ज पुष्पकुमार शाहीले जानकारी दिए ।

सडक बन्द हुँदा रुकुमपूर्वका नागरिक काठमाडौं जान रुकुमपश्चिम वा रोल्पा हुँदै दाङ–बुटवलको बाटो प्रयोग गर्न बाध्य थिए । दाङ झरेर भन्दा रुकुमपूर्वबाट मध्यपहाडी लोकमार्ग हुँदै झण्डै दुई सय किलोमिटर सडक छोटो पर्दछ । यो सडकबाट बाग्लुङ–पोखरा हुँदै छोटो दूरीमै काठमाडौं पुगिन्छ ।