काठमाडौं । इजरायली सेनाको रेडियोले एक सैन्य अधिकारीलाई उद्धृत गर्दै इजरायलले शुक्रबारदेखि विभिन्न देशहरूलाई गाजामा हवाई मार्गबाट सहायता खसाल्न अनुमति दिने बताएको छ । इजरायली सैन्य प्रवक्ताले यो रिपोर्टबारे रोयटर्सले टिप्पणीका लागि अनुरोध गर्दा तत्काल जवाफ दिएनन् ।

गाजा स्वास्थ्य मन्त्रालयका अनुसार, मार्चमा इजरायलले उक्त क्षेत्रमा आपूर्ति बन्द गरेपछि प्यालिस्टिनी क्षेत्रमा १०० भन्दा बढी मानिसहरूको मृत्यु भोकमरीबाट भएको छ ।

इजरायलले सन् २०२३ को अक्टोबरदेखि गाजामा प्यालिस्टिनी लडाकु समूह हमाससँग युद्ध गरिरहेको छ । गत मे महिनामा उक्त नाकाबन्दी हटाएको थियो तर सहायता लडाकु समूहहरूमा पुग्नबाट रोक्न आवश्यक रहेको भन्दै कडा प्रावधानहरू लागु गरेको छ ।

जुलाईको पहिलो दुई हप्तामा, संयुक्त राष्ट्रसंघको बालबालिकासम्बन्धी एजेन्सी युनिसेफले गाजामा पाँच हजार बालबालिकाहरूलाई तीव्र कुपोषणको उपचार गरेको बताएको थियो ।

विश्व स्वास्थ्य संगठनका प्रमुख टेड्रोस अधानोम घेब्रेयेससले बुधबार गाजामा मानवीय सृजित सामूहिक भोकमरी भइरहेको बताए । गाजामा मानवीय सहायताका सामग्री प्रवेशमा नाकाबन्दीका कारण यो अवस्था भएको हो ।