काठमाडौं । भारत सरकारले सगरमाथा संवादको पहिलो संस्करणका निम्ति सहयोगस्वरूप १५ वटा विद्युतीय सवारीसाधन (गाडी) उपलब्ध गराएको छ । 

नेपाल–भारत सहयोग कार्यक्रमअन्तर्गत उपलब्ध गराइएका ती सवारीसाधन आइतबार परराष्ट्र मन्त्रालयमा आयोजित एक समारोहमा भारतीय राजदूत नवीन श्रीवास्तवले परराष्ट्रमन्त्री डा. आरजु राणा देउवालाई हस्तान्तरण गरे । 

त्यस अवसरमा मन्त्री डा. राणाले सहयोगका लागि भारत सरकारलाई धन्यवाद ज्ञापन दिइन् । उनले जलवायु परिवर्तन नेपालको मात्र नभएर यस क्षेत्रकै एक साझा चुनौतीका रूपमा रहेकाले यसको समाधानका लागि पनि सबैको आपसी समन्वय र सामूहिक प्रयास आवश्यक रहेकोमा जोड दिइन् । 
  
सगरमाथा संवाद कार्यक्रमले जलवायु परिवर्तनसम्बन्धी यस क्षेत्रको साझा समस्या उजागर गर्दै समाधानका निम्ति सामूहिक प्रयत्नको मोडल तय गर्ने जानकारी दिँदै उनले यसमा भारत सरकारको सहयोग उल्लेखनीय रहेको बताइन् । 

मन्त्री डा राणाले यही मे १६‐१८ मा आयोजना हुने सगरमाथा संवादको सम्पूर्ण तयारी अन्तिम चरणमा पुगेको जानकारी दिइन् । नेपाल सरकार विदेशी उच्चपदस्थ व्यक्तित्व तथा पाहुनाको स्वागतको प्रतीक्षामा रहेको उनले जानकारी दिइन् । 

सो अवसरमा राजदूत श्रीवास्तवले भारत सरकारले नेपालको आर्थिक, सामाजिकलगायतका क्षेत्रमा पुर्‍याउँदै आएको सहयोगको चर्चा गर्दै सगरमाथा संवादका लागि सवारीसाधन उपलब्ध गराउन पाएकोमा खुसी व्यक्त गरे । 

जलवायु परिवर्तनको चुनौती यस क्षेत्रकै साझा समस्या रहेकाले यसको समाधानमा अवलम्बन गरिने उपायमा भारत सरकार नेपालको साथ रहेको पनि उनले बताए ।