काठमाडौं । संघीय शिक्षा ऐन जारी हुनुपर्ने मागसहित शिक्षक महासंघ विगत २८ दिनयता निरन्तर सडक आन्दोलनमा छ । रघुजी पन्त शिक्षामन्त्री बनेर आएपछि उनले शिक्षक महासंघका प्रतिनिधिसँग केही चरणमा वार्ता गरे पनि शिक्षक–सरकार वार्ताले सार्थकता पाउन सकेको छैन । 

आज मंगलबार पनि सरकार–शिक्षक वार्ता हुने जानकारी गराइएको थियो । तर, वार्ता सुरु हुन सकेको छैन । 

वार्ता सुरु हुन नसक्नुको कारणबारे बाह्रखरीले जिज्ञासा राख्दा शिक्षा मन्त्रालयका सूचना अधिकारी निलकण्ठ ढकालले शिक्षामन्त्री पन्त शिक्षकको पर्खाइमा रहेको तर उनीहरू नआएको बताए । “उहाँहरूको आन्दोलन २ बजेसम्म थियो,” ढकालले भने, “त्यसपछि मन्त्री उहाँहरूलाई पर्खिबस्नुभएको छ ।”
 
यता, शिक्षक महासंघका पदाधिकारीहरूले भने आफूहरूलाई वार्ताबारे औपचारिक जानकारी नै नभएको बताउँछन् । “हामीलाई औपचारिक जानकारी छैन,” महासंघकी सहअध्यक्ष नानुमाया पराजुलीले बाह्रखरीसँग भनिन्, “शिक्षक सम्बद्व संगठनहरूको चलिरहेको छ । यो बैठक सकिएपछि के गर्ने भन्नेबारे टुंग‍ो लाग्छ ।”

नेपाल शिक्षक महासंघका महासचिवमा तुलाबहादुर थापाले पनि आफूहरूलाई थाहा नभएको बताए । “मन्त्री पर्खिरहनुभएको त होला । तर हामीलाई केही जानकारी छैन,” उनले भने, “महासंघको बैठक चलिरहेको छ । के हुन्छ हेरौँ ।”