काठमाडौं । नेपाली कांग्रेसका उपसभापति धनराज गुरुङले सातबुँदे सहमति कार्यान्वयन गर्न आफ्नो पार्टी र नेकपा (एमाले)लाई दबाब दिनुपर्ने बताएका छन् । शनिबार (वैशाख १३) काठमाडौंमा स्याङ्जा पत्रकार समाज नेपालले आयोजना गरेको कार्यक्रममा उनले सरकार कहिले ढल्छ होइन, दुई पार्टीबीचको सातबुँदे सहमति कार्यान्वयनबारे नेताहरूलाई प्रश्न गर्न आग्रह गरे ।

इतिहासमा हालसम्मकै बलियो वर्तमान सरकार भएको उनले उल्लेख गरे । सरकार ढल्ने/नढल्ने बहसको विषय नै नभएको उनले बताए ।

“हामी बलिया छौँ, यति बलियो सरकारलाई आज पनि ढल्छ भनेर लेख्दिया छ,” उनले भने, “भोलि उठ्यो, हेर्‍यो फेरि सरकार ढल्छ भनेर लेख्द्या हुन्छ । अनि, हामीहरूले सरकार ढल्दैन भनेर उत्तर दिनु परेकै छ ।” 

उनले देशलाई स्थायित्व प्रदान गर्न वर्तमान सरकार बनेको बताए । जनताका पक्षमा काम नगर्ने छुट यो सरकारलाई नभएको उनले धारणा राखे ।

उपसभापति गुरुङले विद्यालय शिक्षा विधेयक छिटो अघि बढाउन संसदीय समितिले तत्परताका साथ काम गरिरहेको बताए । शिक्षकले पनि आन्दोलन रोकेर उचित वातावरण बनाउनुपर्नेमा उनले जोड दिए । सबैको राय समेटेर ऐन बनाउनुपर्ने भएकाले ढिला भएको उनको भनाइ थियो ।

नेता गुरुङले राजसंस्थाको माग गर्दै भइरहेको आन्दोलनको कुनै औचित्य नरहेको टिप्पणी गरे ।

स्याङ्जाको ‘लाइफलाइन’का रूपमा रहेको सिद्धार्थ राजमार्गबारे अबको नीति तथा कार्यक्रममा सम्बोधन हुने र बजेट समेत विनियोजन गरिने उनले बताए । हिमालयन टेली भ्वाइस