काठमाडौं । आर्दा गुलरको निर्णायक गोलप्रेरित रियाल मड्रिडले स्पेनिस ला लिगामा गेटाफेविरुद्ध १–० को कठिन जित निकालेको छ ।

बुधबार गेटाफेको मैदानमा कोलिजेयमा पाहुना टिमलाई जित दिलाउन गुलरले पहिलो हाफमा गरेको गोल निर्णायक बन्यो । गुलरले खेलको २१औँ मिनेटमा गोल गरेका थिए ।

जितसँगै ३३ खेलबाट ७२ अंक जोडेको रियाल दोस्रो स्थानमा छ । जारी सिजन रियालको यो २२औँ जित हो । योसँगै रियालले लिडर बार्सिलोनासँगको दूरी चार अंकमा झारेको छ । समान खेलबाट ७६ अंकसहित बार्सिलोना शीर्ष स्थानमा छ । पराजित गेटाफे ३३ खेलबाट ३९ अंकसहित १२औँ स्थानमा छ ।