काठमाडौं । सरकार स्वामित्वको नेपाल विद्युत् प्राधिकरणले अर्धजलाशय (पीआरओआर) जलविद्युत् आयोजना अघि बढाएको छ । प्राधिकणले जुम्ला जिल्लामा ७० मेगावाटको जावा तिला अर्धजलाशय आयोजना अघि बढाएको हो । आयोजना जुम्ला र कालीकोट जिल्ला भएर बग्ने तिला नदीमा प्रस्ताव गरिएको जानकारी विद्युत् प्राधिकरणले दिएको छ । 

विद्युत् प्राधिकरणले आयोजना अघि बढाउन वातावरणीय प्रभाव मूल्यांकनको क्षेत्र निर्धारणको काम सुरु गरेको छ । स्कोप निर्धारणका लागि रायसुझाव मागेको प्राधिकरणले जानकारी दिएको छ ।

आयोजना जुम्लाको तिला गाउँपालिका, हिमा गाउँपालिका, तातोपानी गाउँपालिका र कालीकोटको तिलागुफा नगरपालिकामा पर्ने प्राधिकरणले जनाएको छ । 

आयोजना विद्युत्को माग उच्च भएको समय साँझ  र बिहान सञ्चालन गर्ने लक्ष्य रहेको छ । अर्धजलाशय आयोजनाको पिकिङ समय दैनिक ६ घण्टा हुनेछ । बिहान दुई र बेलुका चार घण्टा आयोजना पूर्ण क्षमतामा सञ्चालन हुने प्राधिकरणले जनाएको छ । 

आयोजनाको बाँध तिला गाउँपालिकाको रारालिहीको पदुदुखोलामा प्रस्ताव गरिएको छ । बाँधबाट ६.४ किलोमिटर लामो सुरुङमार्फत लगिएको पानीलाई नाग्मामा रहेको विद्युत्गृहमा खसाए ऊर्जा उत्पादन हुनेछ । 

आयोजनाको विद्युत्गृहमा ३५–३५ मेगावाटका दुईवटा फ्रान्सिस टवाईन राख्न प्रस्ताव गरिएको छ । उत्पादन हुने बिजुली पुनः तिला नदीमा छाडिने प्राधिकरणले जनाएको छ । आयोजनाको बाँधको उचाइ १८ मिटर र लम्बाइ ५७ मिटर हुनेछ । आयोजनाको डिजाइन वहाव प्रतिसेकेन्ड ५५ घनमिटर हुने भएको छ । 

आयोजना प्रारम्भिक चरणमा रहेको छ । विस्तृत आयोजना प्रतिवेदन तयारीको क्रममा रहेको छ । आयोजना बनाउन झन्डै १५ अर्ब रुपैयाँ लाग्ने प्रारम्भिक अनुमान गरिएको छ । डीपीआर तयारीपछि आयोजनाको लागत यकिन हुनेछ । 

अध्ययन सकेर विद्युत् प्राधिकरणले आयोजना सहायक कम्पनीमार्फत बनाउनेछ । वित्तीय व्यवस्थापन र विद्युत् प्राधिकरणसँग विद्युत खरिदबिक्री सम्झौता (पीपीए) हुन बाँकी छ । पीपीए भएपछि मात्र लगानी जुट्नेछ । 

प्राधिकणले अर्धजलाशय आयोजनाको न्यूनतम  प्रतियुनिट ४.८० देखि दैनिक ६ घण्टासम्म पिकिङ हुने आयोजनालाई अधिकतम १० रुपैयाँ ५५ पैसा पीपीए दर तोकेको छ ।