काठमाडौं । अमेरिकी राष्ट्रपति डोनाल्ड ट्रम्प प्रशासनले भुलवश एल साल्भाडोरको जेल पठाइएको मेरिल्यान्डका एक अमेरिकी नागरिक किल्मार एब्रेगो गार्सिया जीवित रहेको बताएको छ । 

विदेश मन्त्रालयका एक उच्च अधिकारी माइकल कोजाकलाई उदृत गर्दै समाचार संस्था एसोसिएटेड प्रेस (एपी)ले जनाएअनुसार उनी एल साल्भाडोर सरकारको नियन्त्रणमा रहेको एक आतंकवादविरोधी कुख्यात कारागारमा कैद छन् ।

विदेश मन्त्रालयका अधिकारीले उक्त जानकारी समेटिएको दुई पृष्ठको लिखित कागजात त्यहाँको सर्वोच्च अदालतमा पेस गरेको बताइएको छ । यसअघि अदालतले भुलवश एल साल्भाडोर पठाइएको गार्सियालाई अमेरिका फिर्ता ल्याउन आदेश दिएको थियो ।

एक दिनअघि ट्रम्पले यदि अदालतले गार्सियालाई फर्काउनु भनेको छ भने त्यसको पालना गर्दै उनले अमेरिका फर्काउन निर्देशन गर्ने बताएका थिए । 

भुलवश मेरिल्यान्डका नागरिक गार्सियालाई एल साल्भाडोर पुर्‍याएपछि सरकार कानुनी झमेलामा परेको थियो । अदालतले पटकपटक गार्सियालाई देश फर्काउन भने पनि ट्रम्प प्रशासन अटेर गरेर बसेको थियो ।

सर्वोच्च अदालतले गार्सियाको बसोबास स्थान र उनलाई फर्काउन गरिएका प्रयासबारे जानकारी उपलब्ध गराउन समयसीमा तोकेको थियो ।