काठमाडौं । प्रधानमन्त्री केपी शर्मा ओलीले बैंकहरूले ऋणीको क्षमता हेरेर ऋण दिनुपर्ने बताएका छन् । शनिबार (चैत २३) काठमाडौंमा आयोजित ‘एनसेल बाह्रखरी गल्फ तथा आर्थिक परिसंवाद’ कार्यक्रममा उनले ऋणीले आफ्नो क्षमता नबुझ्ने हुँदा बैंकहरूले नै बुझ्नुपर्ने बताए ।

व्यवसाय विकासका निम्ति सरकारले सहज नीति ल्याउने पनि उनले बताए । “बैंकहरूले नागरिकलाई कसरी सहयोग गर्न सक्छन् ? व्यवसायीले नागरिकलाई कसरी सहयोग गर्न सक्छन् ? सबैलाई सहज हुने गरी कानुन बनाउने बाटोमा सरकार रहेको छ,” उनले भने, “व्यवसायीलाई कसरी सहयोग हुन्छ ? यी सबै विषयलाई सरकारले नियालेको छ ।”

बैंकमा कहिले तरलता सहज हुने र कहिले तरलता नै नहुने हुँदा समस्या उत्पन्न भएको बताए । “हाम्रोमा तरलता सहज हुने, कहिले नहुने । यसले समस्या पारेको छ । क्याल्कुलेसन गरेर ऋण दिनुपर्छ । ऋण लिनेहरू क्याल्कुलेट गर्न सक्दैनन्,” प्रधानमन्त्री ओलीले भने, “बैंकको ब्याज तिर्न सक्ने बनाउनु पनि बैंकहरूको कर्तव्य हो ।”