काठमाडौं । नेपाली कांग्रेसका महामन्त्री तथा सांसद गगन थापाले आईटी क्षेत्रमा लगानी बढाउन अहिलेका प्रावधानमा केही खुकुलो हुनुपर्ने बताएका छन् । शनिबार (चैत २३) काठमाडौंमा ‘एनसेल बाह्रखरी गल्फ तथा आर्थिक परिसंवाद’ कार्यक्रममा आफ्नो कार्यपत्र प्रस्तुत गर्दै उनले अहिलेको महँगो पूर्वाधार र ट्याक्स सिस्टमले लगानी नबढ्ने बताएका हुन् ।

“अहिले नेपालले आईटी क्षेत्रमा ठूलो लगानी भित्र्याउन सक्छ । तर, अहिलेको अवस्थामा हामीले बाह्य लगानी भित्र्याउन सम्भव छैन,” उनले भने, “पूर्वधार तयार सरकारले गरिदिनुपर्छ । विश्वबजारमा के चलिरहेको छ, त्यसलाई नेपालले नियाल्नुपर्छ ।”

विश्वविद्यालय, उद्योगी र सरकार मिलेर व्यावहारिक शिक्षामा लगानी बढाउनुपर्ने उनले बताए । सन् २०३० सम्ममा मान्छेले भन्दा धेरै मेसिनले काम गर्ने स्थिति हुने उनको भनाइ छ ।