काठमाडौं । भारतीय प्रधानमन्त्री नरेन्द्र मोदीले प्रधानमन्त्री केपी शर्मा ओलीसँगको भेटवार्ता फलदायी भएको बताएका छन् ।

बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक)को छैटौँ शिखर सम्मेलन सम्पन्न भएपछि ओली र मोदीबीच थाइल्यान्डको राजधानी बैंककमा भेटवार्ता भएको थियो ।

“बैंककमा प्रधानमन्त्री केपी शर्मा ओलीसँगको भेटघाट फलदायी रह्यो,” भेटवार्तापछि भारतीय प्रधानमन्त्री मोदीले सामाजिक सञ्जाल ट्वीटरमा लेखेका छन्, “भारतले नेपालसँगको सम्बन्धलाई ठूलो प्राथमिकता दिएको छ ।”

भारतीय प्रधानमन्त्री मोदीले भेटमा भारत–नेपाल मित्रताका विभिन्न पक्षहरू विशेष गरी ऊर्जा, कनेक्टिभिटी, संस्कृति र डिजिटल प्रविधि जस्ता क्षेत्रहरूमा छलफल गरेको बताएका छन् ।

“हामीले यस वर्षको बिमस्टेक शिखर सम्मेलनबाट प्राप्त केही प्रमुख सकारात्मक परिणामहरू विशेषगरी विपद् व्यवस्थापन र समुन्द्री यातायातका क्षेत्रहरूमा पनि कुरा गर्यौं,” मोदीले भने ।

दुई देशका प्रधानमन्त्रीबीच विशेष गरी विकास साझेदारी, ऊर्जा, जनता–जनता सम्बन्ध र कनेक्टिभिटीका क्षेत्रमा पारस्परिक रूपमा लाभदायक द्विपक्षीय सहयोग बढाउनमा केन्द्रित रहेको थियो ।