काठमाडौं । अमेरिकी सिनेटले बुधबार राष्ट्रपति डोनाल्ड ट्रम्पले क्यानडाविरुद्ध लगाएका केही आयात शुल्क (ट्यारिफ) रोक्ने प्रस्ताव पारित गरेको छ । राष्ट्रपति ट्रम्पको रिपब्लिकन पार्टीका सिनेटरले पनि विपक्षीसँग मिलेर ५१–४८ को मतले उक्त प्रस्ताव पारित गरेका हुन् ।

उक्त प्रस्ताव पारित भएसँगै यो हप्ता क्यानाडाविरुद्ध लागु हुने भनिएको कर रोकिने द न्युयोर्क टाइम्सले जनाएको छ ।

तर, यो प्रस्ताव अमेरिकाको तल्लो सदन हाउस अफ रिप्रेजेन्टेटी (कंग्रेस)ले रोक्ने सम्भावना छ । सिनेटमा जस्तो तल्लो सदन हाउस अफ रिप्रेजेन्टेटी (कंग्रेस)मा रिपब्लिकन नेताले ट्रम्पको करको नीतिलाई चुनौती दिने सम्भावना छैन ।

यसैबीच, युरोपियन युनियन, चीन, बेलायत र भारतलगायत १०० भन्दा बढी देशमा ट्रम्पले व्यापक मात्रामा कर लगाउने घोषणा गरेको केही घण्टापछि नै यो प्रस्ताव पारित भएकाले कंग्रेसका दुवै दलबीच ट्रम्पको व्यापार युद्धविरुद्ध एकजुटता देखिएको बताइएको छ ।

आपत्कालीन अधिकारको विरोध
उक्त प्रस्ताव फेब्रुअरीमा ट्रम्पले क्यानडामा कर लगाउन प्रयोग गरेको ‘अन्तर्राष्ट्रिय आर्थिक आपत्कालीन अधिकार ऐन’लक्षित रहेको बताइएको छ । ट्रम्पले शीतयुद्धकालीन कानुन लगाएर क्यानडालाई कर लगाउने घोषणा गरेका थिए ।

तर, ट्रम्प प्रशासनले क्यानडाबाट अनियन्त्रित मादकपदार्थ तस्करी भइरहेको भन्दै यो अमेरिकी राष्ट्रिय सुरक्षाका निम्ति खतरा भएको जिकिरसहित उसलाई २५ प्रतिशत कर लगाएको थियो ।

ट्रम्पको निर्णयले विश्वबजारमा उथलपुथल मच्चाएको छ । यसबाट अमेरिकी राज्यमा आर्थिक प्रभाव पर्ने चिन्ता बढेको बताइएको छ ।