काठमाडौं । क्यानडाका प्रधानमन्त्री मार्क कार्नीमाथि बौद्धिक चोरी (प्लेजियरिज्म)को आरोप लागेको छ । प्रधानमन्त्री कार्नीलाई सन् १९९५ मा अक्सफोर्ड विश्वविद्यालयबाट पीएचडी गर्ने क्रममा आफ्नो शोधपत्र (थेसिस) “द डाइनामिक एड्भान्टेज अफ कम्पिटिसन”को केही अंश आधिकारिक लेखकलाई उद्वरण नगरी प्रयोग गरेको आरोप लागेको हो ।

समाचारपत्र “द नेसनल पोस्ट”लाई उद्धृत गर्दै बेलायतबाट प्रकाशित हुने इन्डिपिन्डेन्ट पत्रिकाले जनाएअनुसार प्रधानमन्त्री कार्नीको डक्टरेट शोधपत्र मूल्यांकन गर्न तीनजना विज्ञ व्यक्ति छानिएको र तीनैजनाले यसमा बौद्धिक चोरी गरेको आरोप लगाएका छन् ।

तीनै विद्वानहरूले १० वटा सम्भावित बौद्धिक चोरीका घटनाहरू पहिचान गरेको बताइएको छ । तीमध्ये एक ज्योफ्री सिगालेटका अनुसार, प्रधानमन्त्री कार्नीले आफ्नो ३०० पृष्ठको शोधपत्रमा अनुचित रूपमा अरूको काम प्रयोग गरेको महसुस गरको बताएका छन् । अन्य दुई विद्वानहरूमध्ये एकले पनि सिगालेटको विचारसँग सहमति जनाए । तर, प्रधानमन्त्री कार्नीले मुद्दा हाल्न सक्ने डरले आफ्नो नाम उल्लेख गर्न चाहेनन् ।

प्रधानमन्त्री कार्नीमाथि लागेको बौद्धिक चोरी (प्लेजियरिज्म)को आरोपबारे कार्नीका त्यतिबेलाका शोध सल्लाहकार अक्सफोर्ड विश्वविद्यालयको नफिल्ड कलेजकी अर्थशास्त्री मार्गरेट मेयरले उनको कामको बचाउ गरेकी इन्डिपिन्डेन्ट पत्रिकाले जनाएको छ ।