काठमाडौं । फिफा विश्वकप २०२६ छनोटमा बुधबार (चैत १३) बिहान विश्व फुटबलका दुई महारथी अर्जेन्टिना र ब्राजिल प्रतिस्पर्धामा उत्रिँदै छन् । खेल अर्जेन्टिनाको मैदानमा हुनेछ ।

यो खेलमा घरेलु टिमले बराबरी मात्र गरे पनि विश्वकप यात्रा तय गर्नेछ । ब्राजिल पनि जितसहित विश्वकप सम्भावना बलियो बनाउने लक्ष्यसाथ मैदानमा उत्रिनेछ ।

अन्तर्राष्ट्रिय फुटबलमा ब्राजिलले पछिल्लो ६ वर्षयता अर्जेन्टिनाविरुद्ध जित निकाल्न सकेको छैन । ब्राजिलले पछिल्लोपल्ट सन् २०१९ मा सम्पन्न कोपा अमेरिकाको फाइनलमा अर्जेन्टिनालाई हराएको थियो । उक्त खेलमा २–० को जित निकाल्दै ब्राजिलले उपाधि उचालेको थियो ।

त्यसयता यी दुई टिमबीच कुल चार खेल भएका छन् । तीमध्ये अर्जेन्टिना तीन खेलमा विजयी भएको थियो । एक खेल गोलरहित बराबरीमा सकिएको थियो ।

यी दुई टिमबीच सन् १९१४ मा पहिलोपटक प्रतिस्पर्धा भएको थियो । त्यो खेल अर्जेन्टिनाले ३–० ले जितेको थियो । त्यसयता यी दुई टिमबीचको चिरप्रतिद्वन्द्विता आधुनिक फुटबलमा सधैँ चर्चाको विषय बन्दै आएको छ ।

यी दुई टिमबीच हालसम्म ११४ खेल भएका छन् । तीमध्ये ब्राजिलले ४६ खेल जितेको छ । अर्जेन्टिनाले ४२ खेल आफ्नो पक्षमा पारेको छ । २६ खेल बराबरीमा सकिएको इतिहास छ ।

‘सुपर क्लासिको’का रूपमा विश्वचर्चित यी दुई टिमबीचको खेल नेपाली समयानुसार बुधबार बिहान ५:४५ बजे सुरु हुनेछ । यो खेलमा चोटका कारण अर्जेन्टिनाका नियमित कप्तान लियोनल मेसी र ब्राजिलका फरवार्ड नेइमार उपस्थित हुने छैनन् ।

दक्षिण अमेरिकी छनोटको शीर्ष स्थानमा आसीन अर्जेन्टिनाले १३ खेल खेल्दा २८ अंक जोडेको छ । समान खेलबाट २१ अंकको ब्राजिल तालिकाको तेस्रो स्थानमा छ ।