काठमाडौं । नेकपा (एमाले)ले पार्टी अध्यक्षसमेत रहेका प्रधानमन्त्री केपी शर्मा ओलीले राजावादीको प्रदर्शनलाई लिएर गरेको भनिएको टिप्पणीबारे स्पष्टीकरण दिएको छ । सोमबार एक वक्तव्यमार्फत पार्टीका महासचिव शंकर पोखरेलले प्रधानमन्त्री ओलीको अभिव्यक्तिका नाममा 'अनावश्यक सनसनी' फैलाउने काम भएको बताएका छन् ।

नेपाल र भारतका केही सञ्चारमाध्यममा चैत ४ गते बसेको एमाले सचिवालय बैठकमा राजावादीको प्रदर्शनलाई प्रधानमन्त्री ओली भारतप्रति आक्रामक बनेको दाबीसहितका समाचार प्रकाशित भएका छन् । बैठकमा ओलीले आफूलाई भारतले पदबाट हटाउन खोजेको र राजावादीको आन्दोलनलाई साथ दिएको बताएको दाबी समाचारमा गरिएको छ । ओलीले यसबारे संसद्‌मा खुलासा गर्ने बताएको दाबी समाचारमा छ । ओलीले पूर्वराजा ज्ञानेन्द्र शाहलाई पक्राउ गर्ने पनि बताएको जिकिर समाचारमा छ ।

यसै विषयमा आज एमालेका महासचिवले स्पष्टीकरण दिएका हुन् । "पूर्वराजावादीहरूको केही दिन अगाडिको प्रदर्शनलाई लिएर प्रधानमन्त्रीले भन्नुभएको भनेर प्रकाशित गरिएका विषय निराधार र अतिरञ्जित छन् । तिनले अनावश्यक सनसनी फैलाउने एवं नेपाल र भारत बिचको युगौँ पुरानो सम्बन्धमा आशंका बढाउने दुराशय बोकेका छन्," एमालेको वक्तव्यमा भनिएको छ ।

महासचिव पोखरेलले 'इतिहासको पांग्रालाई पछाडि फर्काउने कुनै पनि प्रयासलाई नेपाली जनताले सहजै विफल' पारिदिने विश्वास आफूहरूको रहेको पनि बताएका छन् ।

"नेपालको संविधान र हामीले अवलम्बन गरेको लोकतान्त्रिक गणतन्त्र नेपाली जनताको सार्वभौम चयनको विषय हो । संसारका कुनै पनि लोकतान्त्रिक मुलुक र जनता लोकतन्त्रका ठाउँमा निरंकुशतन्त्रलाई प्रश्रय दिन सहमत हुन सक्दैनन् भन्ने कुरामा हामी स्पष्ट छौँ," उनले वक्तव्यमा भनेका छन् ।

महासचिव पोखरेलले एमाले र पार्टी नेतृत्वको वर्तमान सरकार नेपाल–भारत सम्बन्धलाई अझ प्रगाढ बनाउन प्रतिबद्ध रहेको बताएका छन् । "कुनै विषय भए कूटनीतिक माध्यमबाट समाधान गर्न र बलियो विकास साझेदारी अगाडि बढाउन प्रतिबद्ध छन्," वक्तव्यमा भनिएको छ ।

हेर्नुहोस् विज्ञप्ति