काठमाडौं । शिक्षा, विज्ञान तथा प्रविधिमन्त्री विद्या भट्टराईले सहिद दशरथ चन्द स्वास्थ्य विज्ञान विश्वविद्यालयलाई मानक विश्वविद्यालयका रूपमा स्थापित गर्ने गरी कानुन बनाउन सुझाव दिएकी छन् । प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिको बैठकमा सोमबार (चैत ११) उनले यस्तो सुझाव दिएकी हुन् ।

उनले विश्वविद्यालयमा देखिएको क्यालेन्डर, जनशक्ति व्यवस्थापन र जिम्मेवारीका विषयमा स्पष्ट व्यवस्था गर्नुपर्ने बताइन् । पछिल्लो समय विश्वविद्यालयमा हुने झैझगडा र तालाबन्दीको समस्या पेचिलो बन्दै गएको उनले उल्लेख गरिन् ।

“अहिले सबैभन्दा पेचिलो विषय भनेको विश्वविद्यालयमा हुने तालाबन्दी, त्यहाँ हुने झैझगडा तथा संस्कारजन्य कुरामा हामी कसरी जाने भन्ने विषयमा हामी जानैपर्छ,” उनले भनिन्, “यो विषयलाई समेत विधेयकमा समेटेर जानको लागि म यहाँ अनुरोध गर्न चाहन्छु ।”

मन्त्री भट्टराईले विश्वविद्यालयका पदाधिकारीको अधिकारका विषयमा समेत स्पष्ट व्यवस्था गर्नुपर्ने बताइन् । न्युज एजेन्सी नेपाल