नेपालगन्ज । स्वास्थ्य तथा जनसंख्यामन्त्री प्रदीप पौडेलले पूर्वविशिष्टहरूलाई सुविधा दिन नहुने बताएका छन् । नेपाली कांग्रेस बाँकेले शनिबार (चैत ९) नेपालगन्जमा आयोजना गरेको कार्यकर्ता भेटघाट कार्यक्रममा उनले ‘पूर्वविशिष्टलाई सुविधा दिने व्यवस्था हुँदैन’ भने । 

उनले राज्यले उनीहरू (पूर्वविशिष्ट)लाई मानसम्मान गर्नु ठिक भएको बताए । तर, सुविधा दिन नहुनेमा उनले जोड दिए ।

उनले नेपालगन्ज मेडिकल कलेजका समस्या प्रशासन आफैँले खोज्नुपर्ने बताए । “मेडिकल कलेज नीति र नियमले चल्नुपर्छ र राज्यले निर्धारण गरेका सम्पूर्ण नीति–नियमलाई मान्नुपर्छ,” उनले भने ।

मन्त्री पौडेलले अब कुनै पनि सरकारी, निजी तथा सामुदायिक अस्पतालका दक्ष जनशक्तिलाई दिइने तलब श्रम ऐनले तोकेबमोजिम नभए तिनको सम्बन्धन खारेज गरिने चेतावनी दिए । उनले औषधिको मूल्य समायोजनका निम्ति काम हुन लागेको जानकारी गराए । राष्ट्रिय उत्पादनलाई प्रोत्साहन हुने गरी काम गरिने उनले बताए ।

स्थानीय तहमा आधारभूत अस्पताल निर्माणका निम्ति सरकारले धेरै लगानी गरेको उनले उल्लेख गरे । ती सबै आधारभूत अस्पताल पूर्ण क्षमतामा सञ्चालन हुने उनले बताए ।

उनले बिरामीका निम्ति स्वास्थ्य बिमालाई प्रभावकारी बनाउने सरकारको योजना रहेको सुनाए । ६६ लाख घरपरिवारलाई बिमा योजनामा जोडिने उनले बताए । रासस