काठमाडौं । नेपाली कांग्रेसका नेता डा. शेखर कोइरालाले राजनीतिक दलका नेताहरू किन डराइरहेका छन् भन्ने आफूले बुझ्न नसकेको बताएका छन् । जनताको बलमा आएको लोकतन्त्र त्यति कमजोर नरहेको भन्दै कसैको प्रदर्शनबाट तर्सनुपर्ने अवस्था नरहेको उनको भनाइ छ । 

मोरङ–काठमाडौं सम्पर्क समितिले शुक्रबार काठमाडौंमा गरेको कार्यक्रममा डा. कोइरालाले नेताहरूमा गणतन्त्रलाई सफल पार्ने चिन्ता देखिनुपर्ने बताए ।
 
“आर्थिक र सामाजिक अवस्था बिग्रिएको छ । तर, राजनीतिक अवस्था प्रचार गरिएजस्तो भयावह छैन,” डा. शेखरले भने, “लोकतान्त्रिक गणतन्त्र त्यति कमजोर छैन । हामीहरू किन डराइरहेका छौँ, मैले बुझ्न सकिरहेको छैन ।”
 
उनले लोकतन्त्रमा निषेधको राजनीति नचल्ने भन्दै सत्तारुढ वा प्रतिपक्षी दलले गरिरहेका गतिविधि र प्रतिक्रिया स्वभाविक नभएको बताए । राजावादीहरूको ‘काउन्टर’मा घोषणा भएका कार्यक्रमले कम्युनिष्ट पार्टीहरू लोकतान्त्रिक हुन नसकेको देखाएको उनले टिप्पणी गरे ।
 
“लोकतन्त्रमा निषेधको राजनीति चल्दैन । निषेधको राजनीतिले लोकतन्त्रलाई र हामीलाई नै कमजोर बनाउँछ,” कोइरालाको प्रश्न छ, “सत्तामा बसेका दलले त झन जनतामा डेलिभरी दिने हो । जागरण अभियान भनेर घोषणा गर्ने र अभियान चलाउने कुरा शोभनीय हुन्छ ?”

उनले ०६२/६३ को जनआन्दोलन सुशासनकै नारा दिएर सफल भएको भन्दै सरकार चलाउने पार्टीले त्यसमा ध्यान नपुर्‍याउँदा जनतामा आक्रोस देखिएको बताए । चाँडो विर्सने र व्यक्तिगत स्वार्थमा लाग्ने प्रवृत्तिले नेताहरूको छवि जोगिन नसकेको उनको टिप्पणी छ । 

“नागरिक समाजसँग गिरिजाबाबुसहित सात दलका नेताहरूले बोलेको सम्झन्छु । उहाँहरूले सुशासन र लोकतन्त्रलाई अघि बढाउछौँ भन्नुभएको थियो । त्यसपछि मात्र नागरिक समाज आन्दोलनमा उत्रिएर सफलता प्राप्त भएको थियो । हामीले कति चाँडो विर्सिएको ?,” उनले भने, “आज पनि हामी डराउनु पर्ने अवस्था छैन । तर, हिजो सुशासन दिन्छु भनेकाहरू कांग्रेस र एमाले नै सरकारमा हुँदा किन दिन सकिएन यसले हामी माथि प्रश्न उठाएको छ ।” 

हिजो गर्छु भनेको काम गरे । गठबन्धन बनाउँदाको सात बुँदेमा गर्छु भनेको काम गरे नागरिकमा रहेको असन्तुष्टि हट्ने उनको धारणा बताए ।
 
“हामी सरकारमा बस्दा नागरिकका असन्तुष्टि अन्त्यको इमान्दार प्रयास भयो त ? अनि सरकको नेतृत्व गर्ने पार्टीले जागरणसभा गर्ने समय हो यो ?,” कोइरालाले प्रश्न गरे । 

उनले नागरिक विश्वासमा उभिएको पार्टी नेपाली कांग्रेस राजनीतिको मियो भएको भन्दै पछिल्लो समय उसले पहिचान गुमाएको बताए । त्यसो हुनुमा नेतृत्वले पार्टीलाई नागरिक विश्वासमा हिडाउँन नसक्नु कारण रहेको डा. कोइरालाको भनाइ छ । 

“कांग्रेस ००७ साल यता राजनीतिको मियो हो । नेपाली कांग्रेस नागरिकको पार्टी हो,” डा. कोइरालले भने, “तर, अहिले आएर कहिले एमालेको, कहिले माओवादीको पछि हिँडेको छ । यो कांग्रेसको परिचय होइन । यस्तो कांग्रेसलाई नागरिकले भरोसा गर्दैन ।”
 
उनले सरकार चलाउने संयन्त्रले तल्लो तहसम्म जरा फैलाउन लागेको भन्दै चिन्ता जाहेर गरे । त्यसले लोकतन्त्रलाई कमजोर बनाउँदै पार्टीलाई पहिचानविहीन बनाउने तर्क गरे । 

“अहिले सरकार छ, त्यसलाई चलाउन पार्टीको संयन्त्र बनाइएको छ । यस्तो त कम्युनिष्ट मुलुकमा मात्र हुन्छ,” डा. कोइरालाले भने, “केन्द्रमा त संयन्त्र थियो नै विराटनगर गएको त्यहाँ पनि संयन्त्र बनाउनु पर्ने भन्दैछन् । पालिकामा पनि संयन्त्र बनाउने प्रेसर आयो रे !” 

उनले आफूले बनाउनु हुँदैन भनेर रोकेको भन्दै संयन्त्रले सरकार चलाउने अभ्यास लोकतन्त्रमा उपयुक्त नहुने जिकिर गरे । 

“मैले बनाउन हुँदैन भनेको छु । साथीहरू बनाउनै पर्ने प्रेसर आयो भन्दै हुनुहुन्छ । दबाब खेप्नुस् तर नबनाउनुस् भनेको छु,” उनले भने, “सरकारका संयन्त्रमा कांग्रेस भेटिन छोडेको छ । मेरिट्रोक्रेसी काम गर्न नसकेको देखिँदैछ । अब राष्ट्र बैंकको गभर्नर कस्तो व्यक्ति बन्छ त्यसले नै देशको भविश्यलाई कता लान खोजेको छ भन्ने थाहा हुन्छ ।”