काठमाडौं । नेपाल अन्तर्राष्ट्रिय नाट्य महोत्सव (निटफेस्ट) आजबाट सुरु हुँदै छ । महोत्सवमा हुने अन्तरक्रियाहरूको तालिका सार्वजनिक भएको छ । 

सार्वजनिक तालिकाअनुसार एक हप्तासम्म चल्ने महोत्सवमा रंगमञ्चसँगै कला संस्कृति, सिनेमा, सञ्चारमाध्यम, नीति, राजनीतिलगायत विविध विषयमा छलफल हुनेछ ।

मण्डला थिएटर, थापागाउँमा आयोजना हुने महोत्सवको दोस्रो दिन बिहीबार हुने एउटा अन्तरक्रिया रैथाने ज्ञानको उज्यालो शीर्षकमा हुनेछ । 

शुक्रबार नेपाली रंगमञ्च र सिनेमाको मितेरीपथबारे सेसन चल्नेछ । सेसनमा निश्चल बस्नेत, केकी अधिकारी, दीपक रौनियार र आशान्त शर्मा हुनेछन् । 

शनिबारको छलफलमा मिडियामा रंगमञ्चका विषयले पाउने महत्व र त्यसको प्रस्तुतिकरणबारे रंगमञ्च र मिडियाका अभ्यासकर्ताहरूबीच भलाकुसारी हुनेछ । 

मिडियाको आँगनमा रंगमञ्च शीर्षकमा पनि छलफल हुनेछ । आइतबार हुने राजनीतिमा कलानीति शीर्षक महोत्सवको अर्को महत्वपूर्ण सत्र हो । यसमा पूर्वसंस्कृतिमन्त्री सुदन किराँती, युवा नेता रामकुमारी झाक्री र ठाकुर गैरेले आफ्नो धारणा राख्नेछन् । 

महोत्सवकै आकर्षण मानिएको अर्को सेसन छ, सिमली छायामा बसी । सोमबारको यो सेसनमा दुई फरक पुस्ताका प्रतिभाशाली कलाकार हरिवंश आचार्य र विजय बरालबीच संवाद हुनेछ ।

महोत्सवको अन्तिम सत्र गाउँगाउँमा सिंहदरबार, ठाउँठाउँमा थिएटर रहेको । देशका विभिन्न क्षेत्रको प्रतिनिधित्व गर्ने मेयरहरुबीच हुने यो अन्तरक्रिया संघीयताको सन्दर्भमा रंगमञ्चको विस्तारका प्रयास र सम्भावना बुझ्न सहयोगी हुने आयोजको दाबी छ ।

महोत्सवमा भिक्षु आनन्दको प्रवचन पनि रहनेछ । 

महोत्सव निर्देशक तथा अभिनेता दयाहाङ राईले तेस्रो संस्करणमा महोत्सवमा विभिन्न देशबाट सयभन्दा बढी कलाकार सहभागी हुने बताए । नेपाली कलाप्रेमीहरूले ती कलाकारबाट प्रत्यक्ष अप्रत्यक्ष रूपमा धेरै कुरा सिक्नसक्ने उनले बताए । 

यसपटक चार सहरमा हुने निटफेस्ट काठमाडौंको मण्डला थिएटर सँगसँगै पोखरा, भरतपुर र बेलबारीमा पनि हुँदै छ । 

कला प्रदर्शनी, संगीत, नृत्य प्रदर्शनीलगायत गतिविधिसमेत समेटिने महोत्सवमा १२ देशका १७ नाटक मञ्चन हुनेछन् । निटफेस्ट चैत १२ सम्म चल्नेछ ।