काठमाडौं । प्रतिनिधिसभाअन्तर्गतको सार्वजनिक लेखा समितिको बैठक लगातार नराखिएको भन्दै सदस्यले आपत्ति जनाएका छन् । सिंहदरबारस्थित सभाकक्षमा मंगलबार (चैत ५) बसेको बैठकमा सांसदहरूले यसबारे समिति सभापति ऋषिकेश पोखरेलको ध्यानाकर्षण गराएका हुन् ।

सत्तासाझेदार दल नेपाली कांग्रेसका सांसद रामकृष्ण यादवले बैठक ‘पण्डितलाई हेराएर मात्र बसेजस्तो’ भएको भन्दै कटाक्ष गरे । “लेखा समिति प्रतिनिधिसधाको शून्य समयजस्तो भएको छ । समितिको बैठक पनि पर्वजस्तै एक महिनामा बस्दै छ । पण्डितलाई हेराएर बसेजस्तो भएको छ, आमनागरिकमा निराशा छाएको छ,” उनले भने ।

उनले बैठक निरन्तर राख्न माग गरे ।

उनले धारणा राखेलगत्तै सभापति पोखरेलले एजेन्डामा मात्र केन्द्रित हुन आग्रह गरे । “फागुन ९ गतेपछि कहिले बैठक बस्नुपर्थ्यो र बोलाएन ? भन्न सक्नुहुन्छ ? त्यसपछि १५ वटा उसमितिको बैठक बसेको छ,” उनले भने ।

यादवले पोखरेलले बोल्नेबित्तिकै धारणाको खण्डन गरेको भन्दै आपत्ति जनाए । पोखरेलले आफूले खण्डन नगरेको भन्दै सहयोग गरेको जवाफ फर्काए ।

नेकपा (एकीकृत समाजवादी)का सांसद प्रेम आलेले यादवको भनाइमा सहमति जनाए । “रामकृष्ण माननीयले उठाएको शतप्रतिशत सही छ । उजुरीको चाङ छ, दिनकै बैठक बस्नुपर्थ्यो । तर, बसेका छैनौँ,” उनले भने ।

उनले ‘मिनि पार्लियामेन्ट’ले राम्रो भूमिका खेल्न नसकेको बताए । ट्रंकलाइन र डेडिकेटेड फिडरका विषयमा आजै निर्णय गर्न उनले माग गरे । “ट्रंकलाइन र डेडिकेटेड लाइनको निर्णय नगरेर भाग्नुभएको छ, यसको आजै निर्णय गर्नुपर्‍यो,” उनले भने ।

राष्ट्रिय स्वतन्त्र पार्टी (रास्वपा)का सांसद मनीष झाले पनि बैठकको संख्या बढाउनुपर्नेमा जोड दिए ।