काठमाडौं । देशका केही भूभागका आज वर्षा र हिमपातको सम्भावना रहेको छ । जल तथा मौसम विज्ञान विभागका अनुसार आज गण्डकी प्रदेशमा हल्का वर्षा र हिमपातको सम्भावना रहेको छ । 

बिहान कोसी, मधेस र वाग्मती प्रदेशमा आंशिक बदली रहेको छ । बाँकी भूभागमा मौसम मुख्यतया सफा छ ।

गण्डकी प्रदेशका पहाडी भूभागका एकदुई स्थानमा दिउँसो मेघगर्जन र चट्याङसहित हल्का वर्षाको सम्भावना रहेको छ । उच्च पहाडी तथा हिमाली भूभागका एकदुई स्थानमा हल्का हिमपातको सम्भावना रहेको छ । 

अन्य प्रदेशमा भने आज मौसम आंशिक बदली रहे पनि मुख्यतया सफा रहने मौसमविद् विनु महर्जनले जानकारी दिइन् । 

कोसी र मधेस प्रदेशका केही स्थानमा आज हावाहुरीको सम्भावना रहेको छ । अपराह्नपछि यी दुई प्रदेशमा हावाहुरीको सम्भावना रहेको हो । 

काठमाडौंमा आज वर्षाको सम्भावना नरहेको उनले बताइन् । 

“काठमाडौं उपत्यकामा आज वर्षाको सम्भावना छैन । वायुमण्डलको माथिल्लो भागमा बादल हुनेछ,” उनले भनिन्, “अहिले बिहान पनि काठमाडौंमा हाइक्लाउड देखिएको छ । दिउँसो पनि हुनेछ । तर, यसले वर्षा गराउँदैन ।” 

हावाहुरीको सम्भावना रहेकाले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्नसक्ने विभागको भनाइ छ । यसबाट हुनसक्ने असरबाट बच्न आवश्यक सतर्कता अपनाउन विभागको आग्रह छ ।  

हाल देशमा पश्चिमी र स्थानीय वायुको आंशिक प्रभाव रहेको छ ।