काठमाडौं । यूईएफए च्याम्पियन्स लिग २०२४–२५ को क्वार्टरफाइनल समीकरण पूरा भएको छ । प्रतियोगिताअन्तर्गत बुधबार अन्तिम–१६ का चार खेलको नतिजा निस्किएसँगै क्वार्टरफाइनल पुग्ने आठ टिमको टुंगो लागेको हो ।

अन्तिम–१६ बाट स्पेनका दुई क्लब बार्सिलोना र रियाल मड्रिडले अन्तिम–८ मा स्थान बनाएका छन् । यस्तै, जर्मनीका दुई क्लब बायर्न म्युनिख र बोरुसिया डर्टमन्ड, इंग्ल्यान्डबाट पनि दुई क्लब आर्सनल र एस्टोन भिल्लाले क्वार्टरफाइनलमा स्थान बनाएका छन् ।

अन्तिम–८ यात्रा तय गर्ने अन्य दुई टिममा फ्रान्सको पेरिस सेन्ट जर्मन (पीएसजी) र इटालीका इन्टर मिलान छन् ।

प्रतियोगिताको अन्तिम चारमा स्थान बनाउन अब साविक विजेता रियाल मड्रिडले आर्सनलविरुद्ध प्रतिस्पर्धा गर्नेछ ।

यस्तै, बार्सिलोनाले बोरुसिया डर्टमन्डसँग खेल्दा पीएसजीले एस्टन भिल्ला र बायर्न म्युनिखले इन्टर मिलानसँग खेल्ने तय भएको छ ।

प्रतियोगिताको क्वार्टरफाइनल खेलहरु अप्रिल ९ देखि सुरु हुने तालिका छ ।