काठमाडौं । प्रिमियर लिगमा लिभरपुलको उपाधि यात्रा अहिले नै लगभग सुनिश्चित बनिसकेको छ । प्रिमियर लिगमा लिभरपुलले प्रतियोगिताको अन्तिम नौ खेल बाँकी रहँदा शीर्ष स्थानमा १५ अंकको अग्रता बनाएको छ । सन् १८८८–१८८९ को दशकयता इंग्ल्यान्डको कुनै पनि टिमले यति अग्रता राखेर उपाधि नजितेको इतिहास छैन ।

जारी सिजन लिभरपुलले प्रिमियर लिगअन्तर्गतका खेलमध्ये एक खेलमा मात्र पराजय बेहोरेको छ । लिभरपुलले शनिबार भएको खेलमा साउथह्याम्पटनविरुद्ध ३–१ को जित निकाल्यो । त्यसको अर्को दिन तालिकाको दोस्रो स्थानमा आसीन आर्सनलले म्यानचेस्टर युनाइटेडसँग १–१ को बराबरी खेल्दा लिभरपुलको उपाधि यात्रा झनै मजबुत बनेको छ ।

आर्सनलका पूर्वमिडफिल्डर पाउल मेरसनले थपे, “म अहिले के भन्न चाहन्छु भने आर्सनल शीर्ष चारमा पुग्न केन्द्रित हुनुपर्छ । लिभरपुर धेरै पर पुगिसकेको छ । उनीहरूले एउटममात्र खेल हारेका छन् । प्रिमियर लिगको उपाधि यात्रा दौड समाप्त भइसकेको जस्तै छ ।”

अंक तालिकामा आर्सनलसँग चार अंकको दुरीसहित नटिङ्घम फरेस्ट तेस्रो स्थानमा छ । त्यसको दुई अंकपछि चौथो स्थानमा चेल्सी छ । लगातार चार पटकसम्मको लिग विजेता म्यानचेस्टर सिटी नटिङ्घमसँग १–० ले पराजित भएपछि तालिकाको पाँचौँ स्थानमा झरेको छ । 

कुन दिन उचाल्नेछ लिभरपुलले उपाधि ?
एनफिल्ड क्लब लगभग प्रिमियर लिगको विजेता बनिसक्यो । अब मात्रै उनीहरूले कहिले उपाधि उचाल्नेछन् भन्नेमात्र हेर्न बाँकी छ ।

तथ्यांक निकाल्ने ओप्टाका अनुसार, लिभरपुलको उपाधि जित्ने सम्भावना ९९.६६ प्रतिशत छ । शीर्ष स्थानबाट १५ अंक पछि रहेको आर्सनलको सम्भावना ०.३४ प्रतिशत छ । लिभरपुलले उपाधि सुरक्षित बनाउन अब बाँकी २७ अंकमध्ये १६ अंक बटुलेमात्रै पनि पर्याप्त बन्नेछ । अहिलेको स्थितिमा आर्सनलले बाँकी सबै खेलमा जित निकाले पनि कुल ८५ अंकमात्र जोड्न सक्नेछ । 

कीर्तिमानतर्फ बढ्दै लिभरपुल
प्रिमियर लिगमा सन् २०१९–२० को सिजन लिभरपुलले सात खेल बाँकी छँदै उपाधि सुनिश्चित गरेको थियो । यस सिजन त्यही स्थिति दोहोर्‍यनउन लिभरपुललाई सबै खेल आफ्नो समीकरणअनुसार बन्न आवश्यक छ ।  

त्यसअघि म्यानचेस्टर युनाइटेड (२०००–०१ सिजन) र म्यानचेस्टर  सिटी (२०१७–१८ सिजन)ले पाँच खेल बाँकी हुँदै प्रिमियर लिग पक्का गरेका थिए । यो कीर्तिमानसँग बराबरी गर्न सक्नु पनि लिभरपुलका निम्ति उपलब्धिमुलक बन्ने छ । यस्तै, युनाइटेडले नै ( १९९९–२००० र २०१२–१३) र आर्सनल (२००३–२००४ सिजन)ले चार खेल बाँकी छँदै प्रिमियर लिग सुनिश्चित गरेका थिए । 

प्रिमियर लिगको इतिहासमा म्यानचेस्टर युनाइटेडले सिजनको सबैभन्दा छिटो अप्रिल १४ मा उपाधि सुनिश्चित गरेको थियो । उपाधि जितेको सबै भन्दा पहिला मिति १४ अप्रिल २००१ हो जुन युनाइटेडले जितेको थियो । युनाइटेडको यो कीर्तिमान भंग गर्न लिभरपुललाई बाँकी खेलमा जित निकाल्दै आर्सनलसँगको अंक दुरी अझ बढाउनुपर्ने दबाब छ ।