विराटनगर । प्रधानमन्त्री केपी शर्मा ओलीले जनताका पक्षमा संविधान संशोधन गर्दै जानुपर्ने बताएका छन् । संघीय लोकतान्त्रिक गणतन्त्रका उपलब्धिलाई रक्षा गर्नुपर्ने र कमजोरी भए सुधार गरेर अघि बढ्नुपर्नेमा उनले जोड दिए ।

मंगलबार (फागुन २७) कोसी प्रदेशसभा बैठकमा विशेष सम्बोधनका क्रममा उनले जनताको वृत्तिविकासमा लोकतन्त्र जोड्नुपर्ने बताए । “देशलाई पछाडि होइन, अगाडि बढाउनुपर्छ,” उनले भने ।

श्रमक्षेत्रमा श्रमिकको अभाव रहेको व्यवसायीले सुनाउने गरेको भन्दै उनले मानिस बाहिर गइरहेका दृष्टान्त सुनाए । “स्किल नभएकाले राम्रो काम नपाउने समस्या छ,” उनले भने, “प्रविधिसँगको पहिचान गर्दै दक्ष भए यहीँ सम्भावना छन् ।”

जनसंख्या वृद्धिसँगै खेतीयोग्य जमिन मासिँदै गएको उनले बताए । परिवार बढ्दै जाँदा उपलब्ध जमिन टुक्रँदा त्यसको उत्पादनले नपुग्ने र मानिस बाहिर जाने गरेको उनले उल्लेख गरे ।

“पछाडि परेको नेपाललाई अघि बढाउनुपरेको छ,” भने, “सन् २०३० सम्म दिगो विकास हुने लक्ष्य पूरा हुने देखिँदैन । तर, अघिल्लो वर्ष मूल्यांकन गर्दा हामीले ४८ प्रतिशत काम अघि बढाएका रहेछौँ ।”