बाजुरा । बाजुराको पूर्वी उत्तरी भेगस्थित स्वामीकार्तिक खापर गाउँपालिकामा भीरबाट लडेर मृत्यु भएकाको उद्धारका निम्ति गएका आठजनाको सकुशल उद्धार गरिएको छ ।

आइतबार (फागुन २५) दिउँसो कर्णाली नदीमा माछा मार्न गएका र घर फर्कने क्रममा भीरबाट लडेर स्वामीकार्तिक खापर–२, फयाल गाउँका स्थानीय पुसे भण्डारीको मृत्यु भएको थियो । भीरबाट लडेका भण्डारीको उद्धारका निम्ति गएका सोही गाउँका आठ स्थानीयसहित सुरक्षाकर्मी रातभर भीरको फेदीस्थित कर्णाली नदीको किनारमा रोकिएका थिए । र्‍याफ्टिङमार्फत उनीहरूको उद्धार गरिएको जिल्ला प्रहरी कार्यालय बाजुराले जनाएको छ ।

सोमबार (फागुन २६) बिहान हिमाली गाउँपालिकाको धुलाचौरबाट र्‍याप्टिङ ल्याएर उनीहरूको सकुशल उद्धार गरिएको जिल्ला प्रहरी कार्यालय बाजुराका प्रहरी निरीक्षक देव चौधरीले जानकारी दिए ।

कानुनी प्रक्रिया पूरा गरेर भण्डारीको शव आफन्तलाई बुझाइएको प्रहरीले जनाएको छ । रासस