काठमाडौं । नेपालमा एमजीको एस ५ ईभी सार्वजनिक भएको छ । नेपालका लागि एमजी मोटर्सको आधिकारिक विक्रेता पारामाउन्ट मोटर्सले एमजी एस ५ ईभी आधिकारिकरूपमा सार्वजनिक गरेको हो ।

यस गाडीले विद्युतीय सवारी साधन (ईभी) सेग्मेन्टमा नयाँ मापदण्ड स्थापना गर्ने लक्ष्य राखेको कम्पनीको भनाइ छ ।

कम्पनीले लोकप्रिय एमजी जेडएस ईभीको उत्तराधिकारी भनेको एस ५ ईभी अत्याधुनिक प्रविधि, सुधारिएको प्रदर्शन र आधुनिक विद्युतीय सवारी प्रेमीका लागि उत्कृष्ट विशेषतासहित सार्वजनिक भएको छ ।

एमजी एस ५ ईभी नेपालमा कम्फर्ट र डिलक्स दुई भेरियन्टमा उपलब्ध भएको छ । दुवै भेरियन्टमा ४९ किलोवाटआवरको ब्याट्री र शक्तिशाली ९९ किलोवाटको मोटर छ । यसले अधिकतम २५० न्युटन मिटर टर्क उत्पन्न गर्छ ।

डिलक्स भेरियन्ट लामो दुरी तय गर्न सक्ने विशेष क्षमतासहित सार्वजनिक भएको छ ।

४९ किलोवाटआवर ब्याट्री र ९९ किलोवाट मोटर भएको कम्फर्ट भेरियन्टको सुरुवाती मूल्य ४३ लाख ९९ हजार रुपैयाँ छ । यस्तै, डिलक्स भेरियन्टको मूल्य ४९ लाख ९९ हजार रुपैयाँ छ ।

यस्तै, ६२ किलोवाटआवर ब्याट्री भएको एमजी एस ५ ईभीको मूल्य ५४ लाख ९९ हजार रुपैयाँ छ ।

विशेषता
जेड फो ईभी प्लेटफर्ममा निर्मित एमजी एस ५ ईभीले सेग्मेन्टमै विशेष रहेको कम्पनीको दाबी छ ।

एमजी एस५ ईभीमा विश्वकै सबैभन्दा पातलो ब्याट्री र रियर–ह्विल ड्राइभ कन्फिगरेसन छ । यस्तै, पाँच स्वतन्त्र लिंक सस्पेन्सन प्रणाली र उन्नत इन्जिनियरिङ रहेको गाडीले ड्राइभिङ अनुभव र आरामदायी यात्रालाई नयाँ उचाइमा पुर्‍याउने कम्पनीको दाबी छ ।

यस विशेषताले एमजी एस ५ईभी मूल्यअनुसार सेग्मेन्टकै उत्कृष्ट विद्युतीय एसयूभी बनाउने कम्पनीको दाबी छ ।

एमजी मोटर्स नेपालका जेनेरल म्यानेजर सुनिलबहादुर क्षेत्रीले एस५ ईभी नवीनता, सुरक्षामा सुधार र उत्कृष्ट ड्राइभिङ अनुभव प्रदान गर्ने प्रतिबद्धताको प्रमाण भएको बताएका छन् ।