काठमाडौं । बायर लेभरकुजेनका मुख्य प्रशिक्षक जाबी अलोन्सोले आफ्नो टोली च्याम्पियन लिगको उपाधि दौडमा अघि बढ्न चमत्कार हुनुपर्ने बताएका छन् ।

बुधबार लिगको प्रिक्वार्टरफाइनलको पहिलो लेगमा बायर्न म्युनिखसँग ३–० को हार बेहोरेपछि मुख्य प्रशिक्षक अलोन्सोले उपाधि दौडमा अघि बढ्न चमत्कार हुनुपर्ने बताएका हुन् ।

“खेलको दोस्रो गोल, रातो कार्ड, पेनाल्टी–सबै बायर्नको पक्षमा गयो । यही कारण हामीले यो परिणाम भोग्नुपर्‍यो,” हारपछि अलोन्सोले भने, “हामीले फुटबलमा ठूलाठूला चमत्कार भएको देखेका छौँ । र, अब हामीलाई पनि एउटा चमत्कार आवश्यक छ । यो फुटबल हो, हामीले घरेलु मैदानमा अझै खेल बाँकी छन् ।”

पहिलो लेगमा बायर्नलाई जित दिलाउन ह्यारी केनले दुई र यमल मुसियालाले एक गोल गरेका थिए । यो अलोन्सो मुख्य प्रशिक्षकमा नियुक्त भएयता लेभरकुजेनविरुद्ध बायर्नले निकालेको पहिलो जित हो ।