site stats
बाह्रखरी :: Baahrakhari
खेल
Global Ime bankGlobal Ime bank
नेपालको फुटबल लगावबाट प्रभावित नवनियुक्त मुख्य प्रशिक्षक म्याट रोस

काठमाडौं । नेपाली राष्ट्रिय फुटबल टिमको मुख्य प्रशिक्षकमा नियुक्त भएलगत्तै अस्ट्रेलियाका म्याट रोसले भने, "साफ च्याम्पियनसिप जिताउने लक्ष्य छ ।"

हुन पनि नेपाली टिमले हालसम्म दक्षिण एसियाको विश्वकप मानिने दक्षिण एसियाली फुटबल प्रतियोगिता (साफ च्याम्पियनसिप) को उपाधि जित्न सकेको छैन । सन् १९९३ मा सार्क गोल्डकपबाट सुरु भएको प्रतियोगितामा नेपाली टिमले हालसम्म एकपटक मात्र फाइनलमा प्रतिस्पर्धा गरेको छ ।

अस्ट्रेलियाका ४७ वर्षीय रोसको प्रशिक्षण करियर २० वर्ष लामो छ । सन् २००७ देखि प्रशिक्षण करियरमा होमिएका रोसले त्यसयता अस्ट्रेलिया, युरोप र एसियाका विभिन्न टिमसँग सहकार्य गरिसकेका छन् ।

जर्मनीको टोली एइन्ट्राच्ट फ्रांकफर्टको युवा र महिला टिमको प्रशिक्षण सम्हालेका उनले सोही क्लब सिनियर टिममा भिडियो एनालिस्टको रुपमा पनि काम गरेका छन् । चीनको यू–१५ टोलीको नेतृत्व सम्हालेका उनी नेपाल आउनुअघि युनाइटेड अरब इमिरेट्स (यूएई)को शीर्ष डिभिजन क्लब युनाइटेड एफसीको सहायक प्रशिक्षकको भूमिकामा थिए ।

नेपाली फुटबल माहोलबाट प्रभावित रोस
आइतबार नेपाली टिमको जिम्मेवारी पाएका रोसले एएफसी एसियन कप छनोटका निम्ति ३० सदस्यीय प्रारम्भिक टोलीसमेत डाकिसकेका छन् । आइतबार एन्फाबाट आधिकारिक रूपमा सार्वजनिक भए पनि उनी पछिल्लो एक महिनायता नेपालमै छन् ।

घरेलु मैदानमा भएको चारदेशीय अन्तर्राष्ट्रिय महिला च्याम्पियनसिपमा नेपाली महिला टिमको खेल नजिकबाट नियालेका उनी नेपाली फुटबलको माहोलबाट प्रभावित देखिए ।

“नेपालमा फुटबलप्रतिको लगाव अविश्वसनीय छ । नेपाली महिला टिम र म्यानमारबीचको फाइनलमा दर्शकको उपस्थिति रोचक थियो,” उनले भने, “नेपालको राष्ट्रिय पुरुष फुटबल टोलीको मुख्य प्रशिक्षकको कार्यभार सम्हाल्ने अवसर पाएकोमा निकै हर्षित र सम्मानित महसुस भएको छ । मलाई अहिले म सही ठाउँमा आइपुगेको महसुस भएको छ ।”

रोस यसअघिका इटालियन प्रशिक्षक भिन्चेन्सो अल्बर्टो एनेसको स्थानमा नेपाली टिमको जिम्मेवारीमा आएका हुन् । एनेससँगको सम्झौता नवीकरण नगर्ने निर्णयमा एन्फा पुगेपछि नेपाली टिम मुख्य प्रशिक्षकविहीन बनेको थियो ।

एनेस सन् २०७९ को फागुनमा नेपाली टिमको मुख्य प्रशिक्षकमा नियुक्त भएका थिए । उनी यसै वर्षको सुरुआतमा नेपाली टिमको जिम्मेवारीबाट मुक्त भएका थिए ।

पहिलो चुनौती एएफसी एसियन कप छनोट
रोसको प्रशिक्षणमा नेपाली टिमले यसै महिना सिंगापुरविरुद्ध मैत्रीपूर्ण र त्यसपछि एएफसी एसियन कप छनोटको तेस्रो चरणमा मलेसियाविरुद्ध खेल्नेछ । नेपालले मार्च २१ मा सिंगापुरविरुद्ध उसैको मैदानमा एक मैत्रीपूर्ण खेल खेल्ने छ । लगत्तै नेपालले मार्च २५ मा मलेसियाविरुद्ध छनोटको खेल खेल्ने छ ।

दक्षिण एसियाली फुटबल महासंघ (साफ)को तालिकाअनुसार भए नेपाली टिमले रोसकै प्रशिक्षणमा जुन १५ देखि जुलाई २५ सम्म साफ च्याम्पियनसिपमा पनि प्रतिस्पर्धा गर्नेछ ।

प्रकाशित मिति: मंगलबार, फागुन २०, २०८१  १७:१९
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
सरकारले तत्काल सम्बोधन गरोस् !
सरकारले तत्काल सम्बोधन गरोस् !
Hamro patroHamro patro