विराटनगर । नेकपा (एमाले) मोरङको नेतृत्व चयन गर्न मंगलबार (फागुन २०)लाई तोकिएको मतदानको समय तीन घण्टा पर धकेलिएको छ । एमालेको १०औँ जिल्ला अधिवेशन विराटनगरमा जारी छ ।

निर्वाचन कार्यतालिकाअनुसार, मंगलबार बिहान ९ बजेदेखि मतदान थाल्नुपर्ने थियो । तर, ‘अझै सहमतिको प्रयास जारी रहेको’ भन्दै केन्द्रीय तहबाट दबाब आएपछि निर्वाचन समितिले मतदान अघि बढाउन सकेको छैन ।

मध्याह्न १२ बजेदेखि मात्र मतदानको तयारी गरिएको निर्वाचन समितिले जनाएको छ ।

जिल्ला नेतृत्वका निम्ति पदाधिकारीसहित १६५ जना निर्वाचित हुनेछन् । ती पदका निम्ति ३२५ जनाले उमेदवारी दिएका छन् । एमालेको मोरङ अधिवेशन गएको शनिबार (फागुन १७) पार्टी उपाध्यक्ष रामबहादुर थापा ‘बादल’ले उद्घाटन गरेका थिए । बन्दसत्रमा प्रतिवेदनमाथिको छलफल सकिएको छ ।

संस्थापन (केपी ओली पक्ष) र पूर्वराष्ट्रपति (विद्यादेवी भण्डारी समूह) प्यानल बनाएर चुनावी प्रतिस्पर्धामा उत्रिएका छन् । मोरङमा भण्डारी समूहको नेतृत्व पूर्वजिल्ला अध्यक्ष विनोद ढकालले गरिरहेका छन् ।

अधिवेशनमा संस्थापन पक्षबाट अध्यक्षमा राजकुमार ओझा, उपाध्यक्षमा शान्ति लिम्बू भुजेल, सचिवमा रविन थापा, उपसचिवमा शिल्पा निराला कार्की र ईजालाल राजवंशीले उमेदवारी दिएका छन् । यस्तै, भण्डारी समूहबाट अध्यक्षमा अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष बान्तवा र उषा झाले उमेदवारी दिएका छन् ।