विराटनगर  । नेकपा (माओवादी केन्द्र)को तराई–मधेस जागरण अभियानमा पार्टीका वरिष्ठ उपाध्यक्ष नारायणकाजी श्रेष्ठ पुन: जोडिएका छन् । श्रेष्ठ बिहीबार सुनसरीको बर्जु गाउँपालिकाको शुक्रबारे चोकमा आयोजित सभामा सहभागी भएका छन् । 

झापाको बनियानीमा गत सोमबार उद्घाटन समारोहमा सम्बोधन गर्ने क्रममा कार्यक्रम सञ्चालक छेउमा आएर उभिएपछि श्रेष्ठ झोँक्किएका थिए । त्यहाँबाट हिँडेका उनी चितवन पुगेर त्यहाँ अर्को कार्यक्रममा सहभागी भएका थिए ।

सम्बोधन गरिरहेका श्रेष्ठले नजिकै उभिएका कार्यक्रम सञ्चालक पार्टीका झापा जिल्ला संयोजक राजु आचार्यसँग सवालजवाफ गरेका थिए । यसबारे पार्टी अध्यक्ष पुष्पकमल दाहाल 'प्रचण्ड'ले प्रस्टीकरण दिँदै घटनालाई सामान्य बनाउन खोजेका थिए ।

श्रेष्ठ अभियानअन्तर्गत मोरङका विभिन्न स्थानमा भएका कार्यक्रममा सहभागी भएनन् । सुनसरीका सभामा अध्यक्ष प्रचण्डसँगै उपाध्यक्ष श्रेष्ठले समेत सम्बोधन गरिरहेका छन् । अभियानमा समाजवादी पार्टीका महेन्द्र राय यादव पनि जोडिएका छन् ।

शुक्रबारेमा आयोजित सभामा बोल्दै अध्यक्ष प्रचण्डले यो अभियान जनताका समस्या बुझ्न र पार्टीको नीति, कमजोरी र कार्यदिशा बुझाउन आयोजना गरिएको बताए ।