काठमाडौं । महाशिवरात्रिमा भीभीआईपीकाे सवारीका कारण काठमाडौंको सवारी आवागमन अस्तव्यस्त बनेको छ । सवारी डाइभर्सन गर्दा सवारी आवागमन अस्तव्यस्त बनेको हो ।

राष्ट्रपति रामचन्द्र पौडेल दिउँसो साढे चार बजे दर्शनका निम्ति पशुपतिनाथ मन्दिर जाने कार्यक्रम छ । काठमाडौं उपत्यका ट्राफिक प्रहरी कार्यालयले राष्ट्रपतिको सवारीका क्रममा सवारी डाइभर्सन गरेको हाे । 
 
काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक सञ्जयकुमार राउतले पूर्वजानकारी अनुसार नै आवश्यकताका आधारमा सवारी डाइभर्सन गरिएको बताए । उनका अनुसार चाबहिलबाट बसपार्कतर्फ सवारी डाइभर्सन गरिएको छ । गौशाला चोकमा अत्यधिक भिडभाड भएको छ ।
 
चाबहिलबाट गौशालातर्फ, पुरानो बानेश्वरबाट गौशालातर्फ, ज्ञानेश्वर मैतीदेवीको मोडबाट रातोपुल हुँदै गौशालातर्फ, सिफल चौरबाट जय बागेश्वरीतर्फको रुटमा चल्ने सवारीहरूले वैकल्पिक सडकबाट आवागमन गरिदिन ट्राफिकले अनुरोध गरेको छ । 

गौशलातर्फ चाबहिलतर्फ जाने सडक एकतर्फी मात्रै खुलाइएको छ । पशुपतिनाथमा भक्तजनहरू अत्यधिक चाप हुँदा सवारी डाइभर्सन गरिएको ट्राफिक प्रहरीले जनाएको छ ।