काठमाडौं । नेकपा (माओवादी केन्द्र)का वरिष्ठ उपाध्यक्ष नारायणकाजी श्रेष्ठले ‘जनतासँग माओवादी तराई–मधेस जागरण अभियान’ उद्घाटनका क्रममा आफूलाई बोल्न अवरोध सिर्जना गर्न खोजिएको बताएका छन् ।

मंगलबार चितवनमा सञ्चारकर्मीसँग उनले पार्टी अध्यक्ष पुष्पकमल दाहाल ‘प्रचण्ड’को आग्रहमा आफूले उद्घाटन समारोहमा बोल्न सुरु गर्दा मनोवैज्ञानिक रूपमा अवरोध गर्ने स्थिति उत्पन्न भएको बताए । त्यसपछि मन्तव्य अघि नबढाएको उनले स्पष्ट पारे ।

सोमबार (फागुन १२) झापामा भएको उक्त घटनालाई सामान्य रूपमा लिन उनले आग्रह गरे । उनले प्रचण्डको नेतृत्वमा पार्टी पुनर्गठन र एकताबद्ध ढंगले अघि बढाउन प्रतिबद्ध रहेको बताए । जनतासँग माओवादी तराई–मधेस जागरण अभियानलाई उक्त घटनाले कुनै असर नपार्ने पनि उनले स्पष्ट पारे ।

नेता श्रेष्ठले पार्टीका नेता–कार्यकता, शुभेच्छुकको भावनालाई सकारात्मक लिँदै सार्वजनिक रूपमा नै क्षमायाचना गर्न चाहेको बताए । उनले प्रचण्डको नेतृत्वमा सुरु अभियान असाधारण ढंगले सफल हुने जिकिर गरे ।

सरकारले निरंकुश ढंगले अध्यादेश ल्याएको र त्यो देशको हितमा नरहेको उनको भनाइ थियो । हिमालयन टेली भ्वाइस

भिडियो हेर्नोस्–