काठमाडौं । सम्पत्ति शुद्धीकरण अनुसन्धान विभागले भारतीय नागरिक अशोककुमार सिन्हा र उनकी छोरी निवेदिका सिन्हाविरुद्ध ५३ करोड ९८ लाख ३१ हजार ४४४ रुपैयाँ विगो कायम गरी मुद्दा चलाएको छ । अशोककुमार र उनकी छोरी निवेदिकाले राजस्व चुहावटको कसुर गरी सम्पत्ति शुद्धीकरण गरेको भन्दै विभागले उच्च अदालत जनकपुर अस्थायी इजलास, वीरगञ्जमा निवेदन दिएको हो ।

विभागमा दर्ता भएको उजुरी/सूचनाउपर सम्पत्ति शुद्धीकरणको कसुरमा जाँचबुझ तथा अनुसन्धान हुँदा प्रतिवादीहरूले राजस्व चुहावटको कसुर गरी सो कसुरबाट आर्जित रकमको कारोबार नेपालका वित्तीय संस्थाहरूमा खाता खोली कसुरबाट प्राप्त रकम भएको विभागको ठहर छ । बुवा–छोरीले जानीजानी मुद्दती निक्षेपमा जम्मा गरी सोबाट निरन्तर लाभ लिने कार्य गर्नुका साथै सम्पत्तिको स्रोत र स्वरुपमा परिवर्तन गरी गराई सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा ३ को उपदफा (१)को देहाय खण्ड (क) (ख) (ग) ले निषेधित कार्यहरू गरेको विभागले जनाएको छ ।

विभागले सम्पत्ति शुद्धीकरणको कसुर गरेको तथ्य स्थापित हुन आएको भन्दै अशोककुमारलाई ३४ करोड २४ लाख ३१ हाजर ४८० रुपैयाँ ८९ पैसा विगो कायम गरिएको छ । त्यस्तै, निवेदिकालाई विगो १९ करोड ७३ लाख ९९ हजार ९६४ रुपैयाँ बिगो कायम गरी सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा ३० को उपदफा (१) बमोजिम विगोको दोब्बर जरिवाना र कसुरको मात्राअनुसार कैद सजाय माग गरिएको छ ।

साथै, प्रतिवादीहरूका नामको बैंक मौज्दात, निवेदिका सिन्हाको नाउँको जग्गा एवं अपार्टमेन्ट खरिदका लागि दिएको पेस्की रकम र सम्पत्ति समेत यही ऐनको दफा ३४ को उपदफा (१) को देहाय खण्ड (क) बमोजिम जफत गरी पाउन मागदाबी गरिएको छ ।

यी दुईले सुन व्यापार गरेर अवैध सम्पत्ति आर्जन गरेर नेपाली बैंकहरूमा खाता खोली सम्पत्ति राखिएको र राजस्व अनुसन्धान विभागले अनुसन्धान गरी सम्पत्ति शुद्धीकरण अनुसन्धान विभागमा फाइल बुझाएको थियो ।