काठमाडौं । आर्सनल तथा म्यानचेस्टर युनाइटेडका पूर्वस्ट्राइकर रोबिन भान पर्सी डच क्लब फेयेनुर्डको मुख्य प्रशिक्षकमा नियुक्त भएका छन् । 

सन् २०१९ मा फुटबल करियर टुंग्याएका भान पर्सीले फेयेनुर्डको प्रशिक्षणका निम्ति नेदरल्यान्ड्सकै अर्को टोली हिरेन्भानको जिम्मेवारी छाडेका हुन् । यसअघि, हिरेन्भानको जिम्मेवारीमा पुग्नुअघि भान पर्सीले डिक एड्भोकाटसँग फेयेनुर्डकै युवा टोलीको सहायक प्रशिक्षण सम्हालेका थिए ।

भान पर्सीले सन् २०२७ सम्म फेयेनुर्डको जिम्मेवारी सम्हाल्नेछन् । क्लबमा उनको सहायक प्रशिक्षकका रूपमा रनेने हेक रहने अन्तर्राष्ट्रिय सञ्चारमाध्यमले जनाएका छन् ।

“मेरो र फेयेनुर्डको सम्बन्ध कति बलियो छ भन्ने सबै जनालाई थाहा छ । म बलियो सहायक टोली र खेलाडीको टिमसँग सहकार्य गर्न निक्कै उत्साहित छु,” सम्झौतापछि भान पर्सीले भने । 

गत हप्तामात्रै तत्कालीन प्रशिक्षक डेन ब्रायन प्रिस्कलाई बर्खास्त गरेको फेयेनुर्ड डच लिग तालिकाको तेस्रो स्थानमा छ ।