काठमाडौं । पूर्वराजा ज्ञानेन्द्र शाहले जनताको भलो होस् भनेर ओहदा र सुविधा त्याग गरेको बताएका छन् ।

उनले नेपालको उन्नतिका लागि आफूहरुले के के त्याग गर्नुपर्ने हो तयार रहेको बताउँदै भनेका छन्– नेपाल जोगाउने हो भने देशको समृद्धि र उन्नतिका लागि हामीलाई साथ लिन देशबासीलाई आह्वान गर्दैछौँ ।” 

प्रजातन्त्र दिवसको अवसरमा शुभकामना दिँदै पूर्वराजा  शाहले प्रजातन्त्रको कुरा गर्दा वादविवाद र द्वन्द्व, विरोध र प्रतिरोधको अर्थले रोजिन नहुने बताए ।

“सुन्दर शब्दले मात्र होइन व्यवहारमा प्रजातन्त्रलाई उतार्ने सेवा भाव र आचरण चाहिन्छ,” उनले भिडियो सन्देशमा भनेका छन् ।

निषेधको दृष्टिकोणले प्रजातन्त्रलाई बलियो नबनाउने बताउँदै भने, “पक्ष र विपक्षको अहंकार र आफ्नै आफ्नै किसिमको हठले प्रजातन्त्रलाई गतिशील बनाउन सक्दैन । देशको इतिहास मेटिदै गएको छ । नेपालको अस्तित्व नासिदै गएको छ । होनहार युवा ताँती लाएर बाहिरिएका छन् । नेपालीको पसिना आफ्नो माटोमा नभइ अन्तै पोखिएको छ ।”

व्यवस्था बदलियो भन्नेहरुले अवस्था राम्रोसँग बदल्न नसक्नु दुखद कुरा भएको उनको टिप्पणी छ ।

“यो राष्ट्रमा कुनै संकट नआओस् भन्ने परिकल्पना हो,” शाहले भनेका छन्, “हामीले उदारता राख्दै आयौं । जनताको भलो होस् भनेर ओहदा र सुविधा त्याग गरेका हौं । त्यागलाई कसैले कमजोरी ठान्नु हुँदैन । हाम्रो त्यागको अर्थ सबैलाई समेटेर जाने हो । हाम्रो इतिहासलाई मेटाएर हामी उभो लाग्दैनौं भन्ने हेक्का राखेर अघि बढौँ ।”