काठमाडौं । भारतका लागि नेपाली राजदूत डा. शंकर शर्मा र कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालय संस्थापक प्रा. अच्युत सामन्तबीच टेलिफोन वार्ता भएको छ ।
 
फोनवार्तामा सामन्तले नेपाली विद्यार्थीमाथि दुर्व्यवहार गर्ने अधिकारीहरूमाथि कारबाही गरिएको जानकारी राजदूतलाई गराएका थिए ।
 
“राजदूत शंकर शर्माले केआईआईटीका संस्थापक प्रा. अच्युत सामन्तसँग टेलिफोन वार्ता गर्नुभयो र उनका प्रतिनिधिहरूसँग पनि भेट गर्नुभयो,” नयाँदिल्लीस्थित नेपाली दूतावासले भनेको छ, “प्रा. सामन्तले डा. शर्मालाई केआईआईटीले गरका कारबाहीबारे जानकारी गराउनुभयो जसमा, भीसीबाट सार्वजनिक माफीपत्र र केही कर्मचारीलाई बर्खास्त गरिएका कुरा समावेश थिए ।”
 
केआईआईटीको गल्र्स होस्टलमा आइतबार बी.टेक तेस्रो वर्षमा अध्ययनरत २० वर्षीया नेपाली छात्रा प्रकृति लम्साल मृत अवस्थामा भेटिएकी थिइन् ।
 
विश्वविद्यालयको लापरवाहीका कारण नेपाली छात्राको मृत्यु भएको भन्दै विद्यार्थी आन्दोलित भएपछि रिजस्ट्रारको कार्यालयले सूचना प्रकाशित गरी नेपाली विद्यार्थीलाई तत्काल क्याम्पस खाली गर्न भनेको थियो । 

त्यसपछि सोमबार दिउँसो केआईआईटी विश्वविद्यालयमा अध्ययनरत ५ सयभन्दा बढी नेपाली विद्यार्थीलाई होस्टलबाट उठाएर विभिन्न रेल स्टेसनमा लगेर छोडिएको थियो । उनीहरूलाई त्यहाँबाट आफ्नो घर जान भनिएको थियो ।

सोही विश्वविद्यालयका तेस्रो वर्षका मेकानिकल इन्जिनियरिङका एक पुरुष विद्यार्थी साथीले दुर्व्यवहार गरेपछि उनले आत्महत्या गरेको आशंका गरिएको छ ।

गत महिना विश्वविद्यालयको अन्तर्राष्ट्रिय सम्बन्ध कार्यालय (आईआरओ)लाई प्रकृतिले आफूमाथि दुर्व्यवहार भएको रिपोर्ट गरेकी थिइन् । तर, विश्वविद्यालयले कुनै कारबाही अघि नबढाएपछि प्रकृतिले आत्महत्याको बाटो रोजेको दाबी गरिएको छ ।
 
उक्त घटनाको भारत र नेपालमा आलोचना भएपछि विश्वविद्यालय प्रशासनले सोमबार विज्ञप्ति जारी गर्दै नेपाली विद्यार्थीलाई होस्टलमा फर्कन आग्रह गरेको थियो ।
 
भारतको ओडिसास्थित केआईआईटी विश्वविद्यालयले मंगलबार एक सूचना जारी गर्दै नेपाली विद्यार्थीमाथि दुर्व्यवहार गर्ने दुईजना सुरक्षा कर्मचारी, दुईजना होस्टल र एकजना प्रशासन अधिकारीलाई कारबाही गरेको जनाएको छ । 
क्याम्पसका कर्मचारीहरू नेपाली विद्यार्थीलाई सकेसम्म छिटो क्याम्पसमा फर्काउन सक्रिय भएर लागिरहेको जनाइएको छ ।
 
नेपाली विद्यार्थीलाई फर्काउन सहजीकरण गर्न केआईआईटीमा ‘कन्ट्रोल रुम’ सञ्चालन गरिएको र यसले सातै दिन काम गर्ने सूचना उल्लेख छ । 

आफ्ना केही कर्मचारीले तनावको समयमा गरेको टिप्पणीप्रति केआईआईटीले क्षमा मागेको छ ।