पाकाहरूको सदन मानिने राष्ट्रिय सभाका सदस्यहरूप्रति लक्षित सामाजिक सञ्जालमार्फत प्रकट गरिएको अमर्यादित टिप्पणीप्रति बैठकबाटै खेद प्रकट गर्नु झन् अशोभनीय व्यवहार भयो । यसले पाकाहरूको गरिमामय सदन पनि अभद्र सतही टिप्पणी गर्ने व्यक्तिकै स्तरमा ओर्लेको देखिएको छ ।

राष्ट्रिय सभाले एउटा विधेयक पारित गरेको प्रसङ्गमा टिप्पणी गर्दै प्रतिनिधि सभाका सदस्यसमेत रहेका ज्ञानेन्द्रबहादुर शाहीको नामबाट अत्यन्त असहिष्णु तथा अभद्र टिप्पणी सामाजिक सञ्जालमार्फत सार्वजनिक भयो । शाहीको त्यस अपमानजनक टिप्पणीबाट आक्रोशित राष्ट्रिय सभा सदस्यहरूले आइतवार सदनको बैठकबाटै खेद प्रकट गरे । 

राष्ट्रिय सभालाई पाकाहरूको सदन भन्ने गरिन्छ । यसैले राष्ट्रिय सभाका सदस्यहरूबाट अपेक्षाकृत परिपक्वता, भद्रता एवं सहिष्णुताको अपेक्षा गरिन्छ । सामान्यतः प्रौढतासँगै व्यवहारमा संयम र विवेक पनि बढ्दै जान्छ । यसैले सामाजिक सञ्जालको कुनै स्तरहीन टिप्पणीप्रति राष्ट्रिय सभाबाट प्रकट रोष सदनको गरिमा सुहाउँदो नमानिएको हो ।

सामाजिक सञ्जालमा कुनै व्यक्तिले गरेको छुचो टिप्पणी राष्ट्रिय सभामा चर्चा योग्य विषय नै नमानिनुपर्ने हो । छुचो टिप्पणी गर्ने व्यक्ति प्रतिनिधि सभाको सदस्य भएकाले राष्ट्रिय सभाका सदस्यको बढी चित्त दुखेको हुनसक्छ । यसमा सदस्यहरूले रोषसम्म प्रकट गर्नु सम्भवतः पर्याप्त हुने थियो ।

हल्लाका भरमा गरिएको टिप्पणीप्रति राष्ट्रिय सभा यसरी असहिष्णु हुँदा प्रतिक्रिया अस्वाभाविक र अशोभनीय देखिन पुगेको छ । सम्भवतः यसपटकको गल्तीबाट राष्ट्रिय सभाका पाका सदस्यहरूले संयम र सहिष्णुता बिर्सन नहुने पाठ सिक्नेछन् ।

टिप्पणीकर्ताले पनि  आफ्नो टिप्पणीबाट पाका सांसदहरूको अपमान भएको देखिएपछि सविनय क्षमायाचना गरेको भए उत्तम हुन्थ्यो । विडम्बना, उनले थप चोट पुग्ने टिप्पणी गरे । दुवै पक्षले नेपाली जनताको इज्जत राख्न सकेनन् । अभद्र एवं असहिष्णु टिप्पणीका लागि राष्ट्रिय प्रजातन्त्र पार्टीले पनि टिप्पणीकर्तालाई सचेत गराउनु उचित हुनेछ । 

सदनको गरिमा राख्नु सदस्यहरूको दायित्व हो र त्यसमा राष्ट्रिय सभाका अध्यक्षले अभिभावकत्व लिनुपर्छ । यस प्रकरणमा मूलतः राष्ट्रिय सभाका अध्यक्ष सदनको गरिमा जोगाउन चुकेको देखियो । आशा गरौँ, यस प्रकरणबाट सदनको गरिमाप्रति थप संवेदनशील हुन सम्बन्धित सबै थप सजग हुनेछन् ।