काठमाडौं । ओमान भ्रमणमा रहेकी परराष्ट्रमन्त्री आरजु राणा देउवाले बेल्ट एण्ड रोड इनिसिएटिभ्स (बीआरआई) रणनीतिक गठबन्धन नभएको स्पष्टोक्ति दिएकी छन् । भारतीय मिडिया डब्लूआईओएनसँग कुराकानी गर्दै उनले चीनसँग गरेको रणनीतिक गठबन्धन नभएको बताइन् । 
 
“बीआरआईलाई जुन रूपमा हेरिएको छ, त्यो वास्तवमा नेपालले चीनसँग गरेको रणनीतिक गठबन्धन होइन,” परराष्ट्रमन्त्री राणाले भनेकी छन्, “नेपाल असंलग्न राष्ट्र हो र विश्वको कुनै पनि देशसँग रणनीतिक गठबन्धनमा प्रवेश गर्दैन ।” 

बीआरआईका कारण भारतसँग सम्बन्ध नबिग्रेको पनि उनले स्पष्ट पारेकी छन् । बीआरआर्ई विकासका गतिविधि बारेमा नेपाल र चीनबीचको समझदारीको दस्तावेज मात्र भएको उनले जनाएकी छन् ।
 
डब्लूआईओएनलाई दिएको संक्षिप्त अन्तर्वार्तामा उनले नेपाल सन् २०१७ मा बीआरआईमा प्रवेश गरेको स्मरण गरेकी छन् । 

“नेपाल यस तथ्यको बारेमा स्पष्ट छ । कुनै पनि देश वा संस्थाबाट महँगो ऋण लिने स्थितिमा छैन । चिनियाँ सरकार पनि यस बारेमा धेरै स्पष्ट छ,” परराष्ट्रमन्त्री राणाले भनेकी छन् । 

परराष्ट्रमन्त्री राणा हिन्द महासागर सम्मेलनमा सहभागी हुन गत शुक्रबार ओमानको मस्कट पुगेकी हुन् । परराष्ट्रमन्त्री राणा र भारतका विदेशमन्त्री एस जयशंकरबीच आइतबार मस्कटमा भेटवार्ता भएको थियो ।
 
परराष्ट्रमन्त्री राणाले भारतसँगको सम्बन्धलाई ‘धेरै राम्रो’ भएको बताएकी छन् ।
 
“हाम्रो भेटघाट धेरै राम्रो रह्यो, हामीले धेरै मुद्दाहरूमा कुरा गर्यौं । हाम्रो सीमा क्षेत्र, सीमा स्तम्भहरू, नेपालमा जलविद्युत् क्षेत्रको विकास, व्यापार तथा वाणिज्यलगायत मुद्दामा विशेष कुराकानी भयो,” उनले भनेकी छन् ।
 
नेपाल र भारतबीच समस्या नरहेको उनले बताएकी छन् । कहिलेकाहीँ  थोरै बाधाहरू आएपछि संवादमार्फत समाधान गर्न सफल भएको उनले जनाएकी छन् । “हाम्रो सम्बन्ध राम्रो अवस्थामा छ र नयाँ उचाइमा पुग्नेछ भन्ने कुरामा म विश्वस्त छु,” परराष्ट्रमन्त्री राणाले भनिन् ।
 
प्रधानमन्त्री केपी शर्मा ओलीको भारत भ्रमणको लागि निमन्त्रणाको पर्खाइमा आफूहरू रहेको उनले जनाएकी छन् । भारतले निमन्त्रणा गरेर प्रधानमन्त्री भारत भ्रमणमा जाँदा धेरै खुसी लाग्ने पनि उनले बताएकी छन् ।