पोखरा । पोखरामा मानव सेवा फाउन्डेसनले आयोजना गर्न लागेको कोटिहोम रोक्न उच्च अदालत पोखरामा रिट दायर भएको छ । बिहीबार मात्रै उच्चले आयोजकलाई कोटिहोम गर्न नरोक्न भन्दै पोखरा महानगरपालिकालाई आदेश दिएको थियो ।

शुक्रबार भने तीन अधिवक्ताले लेकसाइडको क्याम्पिङ क्षेत्र र बाराहीघाटमा कोटिहोम गर्न नदिने मागसहित रिट दायर गरेका हुन् ।

अधिवक्ताहरू भगवती पहारी, मीनाकुमारी रानाभाट र गीता आचार्यले मानव सेवा फाउन्डेसन, नेपाल ट्रस्ट, पर्यटन उद्योग वाणिज्य तथा उपभोक्ता संरक्षण निर्देशनालय, पोखरा महानगरपालिका, वडा नं. १३, र १४ सहित जिल्ला प्रशासन कार्यालय कास्की र डिभिजन वन कार्यालय कास्कीलाई विपक्षी बनाएर रिट दर्ता गराएका हुन ।

रिटमा फेवातालको ६५ मिटर र सिमसार संरक्षित क्षेत्रमा रहेको नेपाल ट्रस्टको स्वामित्वमा रहेको बाराहीघाट क्षेत्रको ४८ रोपनी जग्गा मानव सेवा फाउन्डेसले २०८२ वैशाख १ देखि जेठ १५ गतेसम्म गर्ने भनिएको कोटिहोम विराट ज्ञान महायज्ञलाई अस्थायी टहरा समेत बनाउन दिने नेपाल ट्रस्टको सहमति बदर गर्न माग गरिएको छ ।

प्रदेशको उद्योग, पर्यटन, वाणिज्य तथा उपभोक्ता हित संरक्षण निर्देशनालयले पनि कोटिहोमका लागि सहमति दिएको थियो । उक्त सहमति पनि बदर गर्न माग गरिएको छ ।

वडा नं. ६ ले आयोजकलाई दिएको अनुमति गैह्रजिम्मेवार रहेको रिटमा उल्लेख छ । उक्त अनुमति पनि बदर गर्नुपर्ने माग छ ।

मानव सेवा फाउन्डेसनले समिधाका लागि धार्मिक महत्त्व र आस्थाका वृक्षहरू काटेको हुँदा कोटिहोमप्रति नै असन्तुष्टि बढेको उल्लेख गरिएको छ । “यस महायज्ञका सुत्राधार विजय कृष्णमूर्तिले प्रस्तावित स्थानमा नै महायज्ञ गरी छाड्ने आवश्यक परे अधार्मिक कार्य समेत गर्न पछि नपर्ने भनि घोषणा गर्नुभयो । यसबाट हजारौँ वर्षदेखि धार्मिक एंव जातीय एकता कायम रहेको पोखरामा धार्मिक द्वन्द्व बढाउने काम भएको छ । यस्तो सम्भावनालाई समयमा नै रोक्न यी संरक्षित स्थलहरूमा महायज्ञ नगर्नु भनि उक्त फाउन्डेसनका नाममा परमादेश जारी गरी पाउँ,” रिटमा भनिएको छ ।