काठमाडौं । नेकपा (एमाले)का सांसद रघुजी पन्तले देशमा भएका आगलागी/डढेलोका घटनाबारेको जानकारी माग गरेका छन् । आइतबार प्रतिनिधिसभा बैठकको शून्य समयमा उनले त्यस्ता घटना र सरकारको तयारीबारे जानकारी दिन सभामुखसँग ‘रुलिङ’को माग गरे ।

“म सभामुखबाट स्पष्ट रुलिङ चाहन्छु, बीचमा आगलागीका घटना केके भए – तिनको विस्तृत जानकारी यो संसद्लाई दिइयोस्,” उनले भने, “अब आगलागीका घटना नियन्त्रण गर्नका लागि सरकारको तयारी कस्तो छ ? गृहमन्त्रीले जानकारी दिनुपर्‍यो ।”

बाढीपहिरोबाट हुने क्षति न्यूनीकरणका निम्ति सम्पूर्ण तयारी गरिएको भनिएका बेला उद्धारका निम्ति हेलिकोप्टर उडाउन भिजिबिलिटी नभएको भन्ने गृहमन्त्रीको भनाइ उनले स्मरण गरे । “भिजिबिलिटी छैन भन्ने अवस्था नआओस्,” उनले भने ।