काठमाडौं । नेपाली साहित्यका उज्जवल नक्षत्र कवि, नाटककार, साहित्यकार बालकृष्ण समको १२३औँ जन्मजयन्ती विशेष कार्यक्रमका साथ मनाइएको छ ।

बिहीबार कमलपोखरीस्थित साहित्यकार समको शालिकमा माल्यापर्ण गर्दै आरम्भ भएको कार्यक्रममा विद्यालयका विद्यार्थीहरूबीच कविता लेखन प्रतियोगिताको आयोजना गरियो ।

नेपाली शिक्षा परिषद् र कामनपा वडा नंं. १ को संयुक्त आयोजनामा सम्पन्न कविता प्रतियोगितामा वृहस्पति विद्या सदनकी छात्रा आर्या अवस्थी प्रथम भइन् । प्रतियोगितामा नन्दी माध्यमिक विद्यालयकी छात्रा नीमा लामा द्वितीय र वृहस्पति विद्या सदनकै छात्र अजर रेग्मी तृतीय भए । प्रतियोगितामा नन्दी माध्यमिक विद्यालयका छात्र सन्तोषकुमार मण्डलले सान्त्वना पुरस्कार प्राप्त गरे ।

प्रतियोगितामा नीमा लामा, रेश्मा श्रेष्ठ, अजर रेग्मी, सन्तोषकुमार मण्डल, वृक्षा शर्मा, छाया विष्ट, धनलक्ष्मी प्रधान, सुश्रीया दुलाल, आर्या अवस्थी, ललिता विष्ट र पृथक सुवेदीले भाग लिएका थिए ।

प्रमुख अतिथि साहित्यकार प्रा. पिताम्बर दाहालले पुरस्कृत कविहरूलाई प्रमाणपत्र वितरण गर्दै साहित्यकार बालकृष्ण समको तुलना कसैसँग गर्न नसकिने बताए । उनले समसँगका केही स्मृति प्रसंग सुनाउँदै सम बीपी कोइरालाको 'फ्यान' भएको स्मरण गरे । बीपीले पनि समका कविता मनपराउने उनले सुनाए ।

साहित्यकार रमा शर्माले विद्यालयका विद्यार्थीहरूले समको साहित्यलाई बुझ्नुपर्ने उल्लेख गर्दै यस पटकदेखि यो प्रतियोगिता गरिएको बताइन् ।

कार्यक्रममा कविहरू कृष्ण बाउसे, प्रह्लाद पोखरेल, वडा नं. १ का वडाध्यक्ष भरतलाल श्रेष्ठ, सचिव सर्वज्ञराज पौडेल, निर्णायक समितिका संयोजक साहित्यकार ज्ञाननिष्ठ ज्ञवालीले समका बारेमा बोलेका थिए ।