काठमाडौं । नेपाल फुटबल संघ (एन्फा)का वरिष्ठ उपाध्यक्ष वीरबहादुर खड्कामाथि कारबाही हुनुपर्ने माग गर्दै १० वटा क्लबले निवेदन दिएका छन् ।

एन्फाले सञ्चालन गरेको सहिद स्मारक ‘सी’ डिभिजन लिग फुटबलमा म्याच फिक्सिङ भएकोबारे उपाध्यक्ष खड्काले सार्वजनिक रूपमा अभिव्यक्ति दिएको भन्दै ‘सी’ डिभिजन लिग खेल्ने क्लबका १० जना अध्यक्षले निवेदन दिएका हुन् ।

खड्काको अभिव्यक्तिपछि एएफसी र फिफाले समेत म्याच फिक्सिङबारे चासो राखेको थियो ।

क्बल सञ्चालकहरूले एन्फालाई बुझाएको पत्रमा भनिएको छ, ‘‘उपाध्यक्ष खड्काको अभिव्यक्तिप्रति गम्भीर ध्यानाकर्षण भएको छ । यसप्रतिको अभिव्यक्तिले हामी ‘सी’ डिभिजन खेल्ने क्लबहरूको गरिमामा असर परेको छ ।’’

सी डिभिजन लिग गएको जेठमा सम्पन्न भएको थियो । सी डिभिजन लिगमा खेल्ने १४ क्लब छन् । जसको उपाधि सर्लाहीको बागमती क्लबले जितेको थियो ।