काठमाडौं । तराईका धेरै स्थानमा आज पनि हुस्सु र कुहिरो लागेको छ । पूर्वी तराईदेखि पश्चिम तराईसम्म हुस्सु र कुहिरो लागेको छ । 

मौसमविद् सञ्जिव अधिकारीका अनुसार सुदूरपश्चिममा भन्दा पूर्वी नेपालमा हुस्सु र कुहिरो बढी लागेको छ । हुस्सु र कुहिरोका कारण तराईका अधिकांश स्थानमा भिजिविलिटी न्यून छ । 

विराटनगरमा भिजिविलिटी नील (शून्य मिटर) रहेको छ । “चन्द्रगढी र भैरहवामा समान एक हजार मिटर भिजिविलिटी छ,” मौसमविद् अधिकारीले बाह्रखरीसँग भने, “जनकपुर, सिमरालगायत स्थानमा पनि बाक्लो हुस्सु र कुहिरो लागिरहेको छ ।” 

घाम लागेसँगै केही कम हुने हुस्सु र कुहिरो दिउँसोसम्म घट्ने उनले जानकारी दिए । 

यसअघि हिजो (आइतबार) पनि तराईका धेरै स्थानमा हुस्सु र कुहिरो लगेको थियो । हिजो विराटनगरको भिजिविलिटी ५० मिटर थियो । जनकपुर र भैरहवाको समान १०० मिटर भिजिविलिटी मापन गरिएको थियो । 

जाडो नहटेसम्म तराईका धेरै स्थानमा हुस्सु र कुहिरो लाग्ने मौसमविद्हरू बताउँछन् । न्यून भिजिविलिटीका कारण बिहानको समयमा यातायात सेवा प्रभावित हुँदै आएको छ ।