काठमाडौं । नेपाली राष्ट्रिय टोलीकी पूर्वस्ट्राइकर अनु लामाले घरेलु फुटबलबाट पनि सन्न्यास लिएकी छिन् । 

विभागीय टोली एपिएफबाट घरेलु फुटबल खेल्दै आएकी अनुले बुधबार घरेलु फुटबलबाट पनि सन्न्यास लिएको घोषणा गरेकी हुन् । 

बुधबार त्रिपुरेश्वरस्थित दशरथ रंगशालामा सम्पन्न एन्फा महिला लिगको फाइनलमा एपिएफले नेपाल पुलिस क्लबलाई पराजित गरेको थियो । खेल सकिनेबित्तिकै अनुलाई एपिएफका खेलाडीले गार्ड अप द अनरबाट सम्मान गर्दै बिदाइ गरेका थिए । 

अनुले अब घरेलु फुटबल नखेल्ने बताइन् । उनले अब आफ्नो बाँकी जीवन फुटबल कोचका रूपमा व्यतीत गर्ने जानकारी दिइन् । आफूले करिब २१ वर्ष फुटबल खेलेको र अब नयाँ आउने खेलाडीका लागि ठाउँ छाडेको उनले बताइन् । 

अनुले महिला फुटबलको थप विकास गर्न धेरैभन्दा धेरै घरेलु प्रतियोगिता आवश्यक रहेको उल्लेख गरिन् । सन् २०१९ मा अनुले अन्तर्राष्ट्रिय खेल जीवनबाट सन्न्यास लिएकी थिइन् ।