काठमाडौं । ऊर्जा, जलस्रोत तथा सिँचाइमन्त्री दीपक खड्का, ऊर्जा राज्यमन्त्री पूर्णबहादुर तामाङ, विद्युत् उत्पादन कम्पनी लिमिटडका अध्यक्ष बखतबहादुर शाही बुधबार पूर्वाधार विकास समितिमा पुगे  ।

मन्त्री–राज्यमन्त्री सांसदहरूका तिखा प्रश्न सामना गर्ने तयारीका साथ पुगेका थिए । पूर्वाधार समितिमा ऊर्जा, जलस्रोत तथा सिँचाइ मन्त्रालयसँग सम्बन्धित उजुरीमा छलफलको कार्यसूची थियो ।

मन्त्री–राज्यमन्त्री हाइसन्चो भयो । किनभने प्रश्नकर्ता सांसदहरूको ‘कोरम’ नपुगेपछि कुनै जवाफ नै दिनुपरेन ।

समिति बैठक ११ बजेका निम्ति डाकिएको थियो । डेढ घण्टा कुर्दा पनि १३ जना सांसद उपस्थित हुन सकेनन् । समितिको बैठक सञ्चालन गर्न ५१ प्रतिशत सांसदको उपस्थिति चाहिन्छ ।

समिति सभापति दीपकबहादुर सिंहले बैठकमा १२ जना सांसद उपस्थिति रहेको जानकारी दिए । अर्थात्, एकजना सांसद थपिएको भए, कोरम पुग्थ्यो । कोरम नपुगी समिति बैठक स्थगित भएको नकारात्मक समाचार प्रवाहित हुने थिएन ।

डेढ घण्टा बित्दा पनि कोरम नपुगेपछि सभापति सिंह बैठक स्थगित गर्न बाध्य भए । उनले यही माघ २४ गते अर्को बैठक बस्ने गरी स्थगित गरेका थिए ।

“कोरम नपुग्नुलाई अन्यथा ठान्नुहुन्न,’’ सभापति सिंहले बाह्रखरीसँग भने, “सहिद दिवसका कार्यक्रमले गर्दा सांसदहरू उपस्थित हुन नसक्नुभएको हुन सक्छ । बिदाको दिन भएकाले उहाँहरू सहिद दिवसको कार्यक्रममा सहभागी हुन जानुभएको होला । हामीले बैठक सुरु गरेको एक घण्टासम्म आउँदा हुन्छ भनी जानकारी दिएका थियौँ । उहाँहरूको कार्य व्यवस्तता र जिल्ला बाहिर रहनुभएका कारण कोरम पुगेन ।”

बैठकमा ४८ प्रतिशत सांसदको मात्रै उपस्थितिले हिउँदे अधिवेशनसमेत कस्तो हुने संकेत गर्छ । करिब पाँच महिनापछि शुक्रबारदेखि संसद्को हिउँदे अधिवेशन प्रारम्भ हुँदै छ । सांसदहरूको उपस्थिति हेर्दा हिउँदे अधिवेशन पनि चिसो हुने हो कि आभास गराउँछ ।