काठमाडौं । आईसीसी च्याम्पियन्स लिगका दौरान आफ्नो आधिकारिक जर्सीमा आयोजक राष्ट्रको नाम नराख्ने हल्ला भारतीय क्रिकेट बोर्ड (बीसीसीआई)ले खारेज गरेको छ । बीसीसीआईका सचिव देवाजित साइकियाले पाकिस्तान च्याम्पियन्स ट्रफीको आयोजक भएकाले नै भारतले जर्सीमा उक्त राष्ट्रको नाम नराख्ने विषय सत्य नभएको बताएका हुन् ।

उनले अरू टिमले जे गरे पनि आफूहरूले खेल भावनालाई पछ्याउने स्पष्ट पारे । “बीसीसीआईले च्याम्पियन्स ट्रफीका दौरान आईसीसीको पहिरन नियम पालना गर्नेछ । अरू टिमले ड्रेस कोड र लोगोका बारेमा जस्तो गरे पनि हामी क्रिकेटको भावनालाई पछ्याउनेछौँ,” सचिव साइकियालाई उद्धृत गर्दै भारतीय सञ्चारमाध्यमले लेखेका छन् ।

बीबीसीआईले च्याम्पियन्स ट्रफीको जर्सीमा आयोजकको नाम नराख्ने मिडिया रिपोर्ट यसअघि सार्वजनिक भएको थियो ।

भारतले च्याम्पियन्स ट्रफीका निम्ति पाकिस्तानको यात्रा गर्न भने अस्वीकार गरिसकेको छ । आईसीसीले पाकिस्तानसँग सहमति गर्दै भारतका खेलहरू युनाइटेड अरब इमिरेट्स (यूएई)मा गराउने तय गरिसकेको छ । सहमतिअनुसार पाकिस्तानले पनि अबदेखि भारतमा हुने आईसीसीका प्रतियोगिता ‘तटस्थ’ भूमिमा खेल्नेछ ।