काठमाडौं । नेपाल राष्ट्र बैंकका गभर्नर महाप्रसाद अधिकारीले निक्षेपकर्ताको निक्षेप डुब्न नदिने बताएका छन् । बिहीबार राष्ट्रिय वाणिज्य बैंकको ६०औँ वार्षिकोत्सवमा उनले यस्तो बताएका हुन् ।

“कुनै संस्था समस्यामा पर्‍यो भने त्यसको तथ्यांक राष्ट्र बैंकमा हुन्छ । कुनै पनि वित्तीय संस्थालाई व्यवस्थापन गर्ने जिम्मेवारी हाम्रो हो,” उनले भने, “राष्ट्र बैंकले रेगुलेट गरेको संस्थाको डिपोजिटरलाई हामी कुनै पनि हालतमा समस्या पर्न दिँदैनौँ । त्यो हाम्रो प्रत्याभूति नै हो ।”

राष्ट्र बैंकले सुपरिवेक्षण तथा नियमन विभागबाट निगरानी गरिरहेको भन्दै उनले बाहिरी हल्लाको पछि नलाग्न आग्रह गरे । राष्ट्र बैंकले सबै वित्तीय संस्थालाई नजिकबाट हेरिरहेको उनको भनाइ थियो ।

राष्ट्र बैंक स्पष्ट रहेको उनले बताए । आर्थिक गतिविधि कम भएको समयमा केही संस्थालाई समस्या परेको हुन सक्ने उनले उल्लेख गरे ।

राष्ट्र बैंकले हेर्ने संस्थामा प्रशस्त प्रोभिजन भएकाले डराइहाल्नुपर्ने अवस्था नरहेको उनले स्पष्ट पारे । बैंक तथा वित्तीय संस्था समस्यामा भन्ने हल्ला मात्र भएको उनले जिकिर गरे ।