काठमाडौं । अर्थतन्त्रका सूचक बलियो हुन थालेपछि आयात/निर्यातमा वृद्धि देखिएको छ । आर्थिक वर्षको पछिल्ला ६ महिनामा आठ खर्ब २२ अर्ब ३७ करोड रुपैयाँबराबरको वस्तु आयात भएको हो ।

यो अघिल्लो आर्थिक वर्षको ६ महिनाको अवधिभन्दा ७.०६ प्रतिशतले बढी हो । अघिल्लो आर्थिक वर्षमा सात खर्ब ६८ अर्ब १६ करोड रुपैयाँ बराबरको वस्तु आयात भएको तथ्यांकले देखाउँछ ।

पुस महिनामा एक खर्ब ६० अर्ब ८८ करोड रुपैयाँ बढीको वस्तु आयात भएको छ । मंसिरको तुलनामा यो १२ अर्ब रुपैयाँ बढी हो । विभागको तथ्यांकअनुसार कात्तिकदेखि आयात/निर्यातको सूचकांक बढेको छ ।

यस्तै, निर्यातमा पनि वृद्धि देखिएको छ । ६ महिनाको अवधिमा ९८ अर्ब ७८ करोड ९२ लाख रुपैयाँ बराबरको मालसामान निर्यात भएको भन्सार विभागको पछिल्लो तथ्यांकले देखाउँछ ।

अघिल्लो आर्थिक वर्षको सोही अवधिमा ७४ अर्ब ९६ करोड ८० लाख रुपैयाँ बराबरको मालवस्तु निर्यात भएको तथ्यांकले देखाउँछ । विभागका अनुसार गत आर्थिक वर्षको ६ महिनाको तुलनामा निर्यात ३१.७८ प्रतिशत बढेको देखिन्छ । विभागको तथ्यांकअनुसार पुसमा २५ अर्बको मालसामान निर्यात भएको छ ।

आयात बढेसँगै व्यापार घाटा पनि बढेको तथ्यांकले देखाउँछ । चालु आर्थिक वर्षको ६ महिनाको अवधि र अघिल्लो आर्थिक वर्षको सोही अवधिको तुलना गर्दा व्यापार घाटा ४.३८ प्रतिशत बढेको देखिन्छ ।

समीक्षा अवधिमा व्यापार घाटा साढे १३ अर्बले बढेर सात खर्ब २३ अर्ब रुपैयाँ पुगेको विभागको तथ्यांकले देखाउँछ । आर्थिक वर्ष २०८०/८१ को ६ महिनाको अवधिमा व्यापार घाटा ६ खर्ब ९३ अर्ब रुपैयाँ थियो ।

यसरी ६ महिनामा कुल नौ अर्ब २१ करोड रुपैयाँ बराबरको वैदेशिक व्यापार भएको विभागको तथ्यांकले देखाउँछ । जुन गत आर्थिक वर्षको तुलनामा ९.२५ प्रतिशतले बढी हो ।