काठमाडौं । विश्वकै शक्तिशाली रकेट स्टारसिपको सातौँ परीक्षण पनि असफलभएको छ। रकेट आज बिहान नेपाली समयअनुसार बिहान ४:१५ बजे टेक्सासको बोका चिकाबाट प्रक्षेपण गरिएको थियो । 

प्रक्षेपणको ८ मिनेटपछि बुस्टर अलग भएर प्रक्षेपण प्याडमा फर्किएको थियो । तर, रकेटमा अक्सिजन चुहावट भएका कारण त्यो विस्फोट भयो ।

अन्तरिक्ष यान र सुपर हेभी रकेटलाई सामूहिकरूपमा 'स्टारसिप' भनिन्छ । स्टारसिपमा ६ वटा र्‍याप्टर इन्जिन छन् भने सुपर हेभीमा ३३ र्‍याप्टर इन्जिन छन् ।

रकेटमा विस्फोट भएपछि यसका टुक्राहरू जमिनमा खसेका थिए । एलन मस्कले यसको तस्बिर सामाजिक सञ्जालमा सेयर गरेका छन् ।

Preliminary indication is that we had an oxygen/fuel leak in the cavity above the ship engine firewall that was large enough to build pressure in excess of the vent capacity.

Apart from obviously double-checking for leaks, we will add fire suppression to that volume and…

— Elon Musk (@elonmusk) January 17, 2025

यसअघि, स्टारसिपको छैटौँ परीक्षण नोभेम्बर २० मा टेक्सासको बोका चिकाबाटै गरिएको थियो । परीक्षण हेर्न अमेरिकाका नवनिर्वाचित राष्ट्रपति डोनाल्ड ट्रम्प पनि स्टारबेसमा पुगेका थिए । त्यतिबेला बुस्टरलाई प्रक्षेपणपछि लन्चप्याडमा फिर्ता गर्नुपर्ने थियो । तर, सबै प्यारामिटर ठिक नभएका कारण पानीमा अवतरण गर्ने निर्णय गरिएको थियो ।

स्टारसिपलाई एलन मस्कको कम्पनी स्पेसएक्सले बनाएको हो । यसको उचाइ ३९७ फिट छ । यसलाई पूर्णरूपमा पुन: प्रयोग गर्न मिल्ने गरी बनाइएको छ । यसले १५० मेट्रिक टन भार बोक्न सक्छ । यसले एक पटकमा १०० जनालाई मंगल ग्रहमा लैजान सक्ने अन्तर्राष्ट्रिय सञ्चारमाध्यमले जनाएका छन् ।