काठमाडौं । भारतको गृह मन्त्रालयले दिल्लीका पूर्वमुख्यमन्त्री अरविन्द केजरीवालविरुद्ध ‘मनी लाउन्डरिङ’ (सम्पत्ति शुद्धीकरण)को मुद्दा दायर गर्न प्रवर्तन निर्देशनालय (ईडी)लाई स्वीकृति दिएको छ ।

दिल्लीका उपराज्यपाल विनयकुमार सक्सेनाले केजरीवालमाथि मुद्दा चलाउन अनुमति दिएको केही दिनपछि गृह मन्त्रालयले पनि स्वीकृति दिएको हो । ईडीले गत डिसेम्बर ५ मा अनुमति मागेको थियो । तर, उपराज्यपाल सक्सेनाले गत शनिबारमात्र अनुमति दिएका थिए ।

सर्वोच्च अदालतले गत नोभेम्बर ६ मा केजरीवालविरुद्ध मुद्दा चलाउन उपराज्यपाल र गृह मन्त्रालयको स्वीकृति लिनुपर्ने भनेको थियो ।

दिल्लीमा आउने फेब्रुअरी ५ मा विधानसभा चुनाव हुँदै छ । त्यसको २० दिनअघि गृह मन्त्रालयले केजरीवालविरुद्ध मुद्दा चलाउन स्वीकृत दिएको हो ।

आम आदमी पार्टीले भने गृह मन्त्रालयको निर्णयको विरोध गरेको छ । पार्टीकी प्रवक्ता प्रियंका कक्कडले झुटा मुद्दा दायर गरेर आम आदमी पार्टीका नेताहरूलाई बदनाम गर्ने प्रयासलाई निरन्तरता दिइएको बताएकी छन् । तर, सत्तारूढको पुरानो तरिकालाई जनताले बुझिसकेको उनको भनाइ छ ।